Qabyldady degen sóz emes: Álimhanulynyń menedjeri dopıng daýyna qatysty málimdeme jasady
ASTANA.KAZINFORM - Bokstan orta salmaqtaǵy WBO jáne IBF nusqasy boıynsha álem chempıony Jánibek Álimhanulynyń menedjeri Berik Sultan sportshynyń ekinshi dopıng synamasynan tyıym salynǵan zat tabylǵany anyqtalǵannan keıin málimdeme jasady.
Berik Sultan Jánibek Álimhanulynyń tájirıbeli, adal jáne keremet boksshy, adam ekenin jáne ómirinde dopıng qabyldaý týraly eshqashan oılamaǵanyn aıtty.
– V synamasynan da sol zat shyqqan eken. Ókinishti, árıne. Biraq basqasha bolý múmkindigi tómen edi. Endigi qadam ne bolady, sony kútip otyrmyz. Bizdiń mamandar aınalysyp jatyr. Qaıdan aǵzaǵa kirýi múmkin degen suraq kóterilip jatyr. Óıtkeni Jánibek tyıym salynǵan zat qoldanbaǵan. Aqyryn kúteıik, - dedi Berik Sultan.
Onyń aıtýynsha, qazir bul máselemen sarapshylar aınalysyp jatyr. Sportshynyń menedjeri buǵan eshkimdi kinálaı almaıtynyn atap ótti.
– Áleýmettik jeli túrli aqparat taralyp, jankúıerlerdi shatastyryp jatyr. Jánibek 4 jylǵa kásipqoı bokstan shettetildi, eki tıtýlynan aıyrypty degen aqparat kórip qaldym. Ókinishke qaraı, A synamasynan da, V synamasynan da tyıym salynǵan zat shyqty. Bul Jánibek dopıng qabyldady degen sóz emes. Jánibek eshqashan dopıng qabyldamaǵan. Ol – kásibı sportshy. Jeti jyldan beri túrli synaqtan aman ótken, mundaı zat shyqpaǵan. Jánibektiń aǵzasynan shyǵyp otyrǵanyn zerthana anyqtaǵany ras. Ol aǵzaǵa qalaı tústi, ne arqyly tústi, sol zerttelip jatyr. Eshkimdi kinálaýdan aýlaqpyz. Kózben kórip, qolmen ustamaǵannan keıin bireýdi aıyptaǵymyz kelmeıdi. Eń bastysy, ar aldynda tazamyz. Jánibek aq! Eshqandaı tyıym salynǵan zat qoldanbaıdy. Bokstaǵy dopıng daýy boıynsha mamandar aınalysyp jatyr. Promoýter, menedjer men zańgerler jumys istep jatyr. Jánibek te, men de eshteńe jasaı almaımyz. Bizdiki tek kútý. Barynsha az ýaqytqa shettetilý boıynsha jumys atqarylyp jatyr. Qaıǵyryp otyra bergennen eshteńe sheshilmeıdi. Budan da ótemiz, - dedi Berik Sultan.
Ol sonymen qatar resmı sheshim qabyldanǵannan keıin Jánibek Álimhanuly barlyq suraqqa jaýap beretinin málimdedi.
Qazaqstan kásipqoı boks federatsııasynyń prezıdenti Rahymjan Erdenbekov alǵash ret Jánibek Álimhanulynyń dopıng-synamasynyń qorytyndysyn jarııalap, tyńdaý týraly egjeı-tegjeıli aıtyp bergen edi.
Jánibek Álimhanulynyń «V» synamasy dopıng baryn rastaǵanyn jetkizdi.
Eske salaıyq, 2025 jyldyń 6 jeltoqsanyna josparlanǵan WBA nusqasy boıynsha álem chempıony Erıslandı Laramen úsh tıtýl úshin ótetin jekpe-jekke úsh kún qalǵanda qazaqstandyq chempıonnyń synamasynan tyıym salynǵan meldonıı zaty tabylǵany jarııalandy. Sóıtip Jánibektiń eń mańyzdy jekpe-jegi toqtatyldy.
Qazaqstandyq boksshy Jánibek Álimhanulynyń dopıng daýyna qatysty isi 23 qańtarda qaıta qaralatynyn jazǵan bolatynbyz.
WBO jáne IBF tujyrymdary boıynsha orta salmaqtaǵy álem chempıony Jánibek Álimhanuly dopıng daýyna qatysty pikir bildirgen edi.