Kabel urlaǵan 4 elordalyq ustaldy
NUR-SULTAN. QazAqparat – Elordalyq polıtsııalar quny 1 mln teńgeden asatyn kabeldi urlaǵan kúdiktilerdiń sýretterin jarııalady, dep habarlaıdy QazAqparat.
«21 jeltoqsan kúni áskerı polıtseı men qalalyq polıtseılerdiń birlesken patrýldeýi barysynda tańǵy saǵat 05:00-der shamasynda Telman turǵyn alabynda kúdikke ilikken 4 er adam ustaldy. Olar tań aldyndaǵy qarańǵylyqty paıdalanyp «Gazel» avtokóligine júk tıep jatqanyn baıqaǵan. Tekserý barysynda 4 kúdiktiniń kabel urlaǵany anyqtaldy», - dep habarlaıdy qalalyq Polıtsııa departamentiniń baspasóz qyzmeti.
Departamenttiń málimetinshe, kúdiktiler 1 mln teńgeden astam somaǵa shyǵyn keltirdi.
«4 kúdiktiniń 3-i buryn urlyq, tonaý jáne kólik aıdap ketý isteri boıynsha sottalǵan. Kúdiktilerden túsinikteme alynyp, urlanǵan kabelder qaıtaryldy. Jáne olardyń basqa qylmystarǵa qatysynyń bar joǵy tekserilýde. Sol sııaqty olar ýaqytsha ustaý ızolıatoryna qamaldy. Olarǵa qatysty QR QK-niń 188-baby 2-tarmaǵy «Urlyq» isi boıynsha tekserý jumystary júrip jatyr», - delingen habarlamada.
