Kabeldik operatorlar «Teleradıo habarlaryn taratý týraly» zańnyń jańa normasyn keıinge qaldyrýdy surap otyr
ASTANA. QazAqparat - Kabeldik operatorlar «Teleradıo habarlaryn taratý týraly» zańnyń jańa normasyn 6 aıǵa keıinge qaldyrýdy surap otyr. Zań boıynsha, 2016 jyldyń 1 qańtarynan bastap, operatorlar taratatyn sheteldik telearnalarda jarnama blogtary kórsetilmeýi tıis.
Bul týraly búgin atalmysh saýalǵa qatysty ótken jıynda Qazaqstannyń Ulttyq tele-radıo habarlaryn taratýshylar qaýymdastyǵy zań qyzmetiniń basshysy Sergeı Vlasenko málim etti.
«Bul kabeldik televızııa operatorlarynyń suraýy. Zańdy oryndaý úshin olarǵa 6 aı daıyndyq qajet. Zań óte qatań dese de bolady, ol 2016 jyldyń 1 qańtarynan bastap kúshine enbek. Eger osyǵan deıin operatorlar sheteldik telearnalardan jarnamany alyp tastaı almasa, ózderi jabylyp qalady», - dep atap ótti ol tilshilerge bergen suhbatynda.
Aıta keteıik, «Teleradıo habarlaryn taratý týraly» jańa zań 2016 jyldyń 1 qańtarynda kúshine enedi. Ol boıynsha, bizdiń elde qaıta translıatsııalanatyn sheteldik telearnalarda jarnama bolmaýy tıis. Jarnamalardy qıyp otyrýǵa qatysty jańa mindet, otandyq operatorlardyń moınyna júktelýi yqtımal. Bul óz kezeginde eldegi shaǵyn jáne orta bıznestiń damýyna kúmánmen qaraýǵa ıtermeleýde, deıdi qaýymdastyq ókili.
«Zańnyń atalmysh normasyn oryndaý jarty aıda tehnıkalyq turǵyda múmkin be degen saýal týady. Bul merzim óte az. Tehnıkalyq, qarjylyq turǵyda ony oryndaýǵa keminde jarty jyl nemese bir jyl kerek. Sonda ǵana otandyq operatorlar naryǵyn saqtap qala alamyz», - dep atap ótti S.Vlasenko.
Óz kezeginde QR IDM Baılanys, aqparattandyrý jáne aqparat komıteti basqarma jetekshisi Rýslan Ábdihalyqov osy máselege qatysty mınıstrliktiń ustanymy týraly aıtyp berdi.
«Mınıstrliktiń ustanymy mynadaı - kabeldik operatorlar qaısybir jarnamalardy qıyp otyrýlary mindetti emes bolady. Sebebi olar qaıta translıatsııalaýdy júrgizedi, sondyqtan sheteldik kontentti olar daıyn kúıinde alýlary shart. Múmkin olarǵa júgirtpe joldy ornalastyrý qaldyrylady. Jarnama tek Qazaqstanda tirkelgen sheteldik telearnalarda bolýy mindetti», - deıdi ol.
