Qabdesh Jumadilov: Azııa elderi bir-birine ádebıetin nasıhattaýy kerek

NUR-SULTAN. QazAqparat – Qazaqstannyń halyq jazýshysy Qabdesh Jumadilov elordada ótip jatqan Azııa qalamgerleriniń І forýmy qurlyq elderiniń ádebıetin bir-birine nasıhattaýǵa jol ashatynyna senim bildirdi, dep habarlaıdy QazAqparat tilshisi.

«1973 jyly Almatyda Azııa-Afrıka elderi aqyn-jazýshylarynyń konferentsııasy ótti. Jas kezimiz edi. Árqaısymyzdy bir-bir eldiń delegatsııasyn kútip alýǵa mindettep qoıǵan. Men Kendzabýro Oe bastaǵan japon jazýshylaryn kútip aldym. Elge attanǵansha basy-qasynda boldym. Ol Ánýar Álimjanovtyń basshylyǵynda jasalǵan shara edi. Al endi bul forým 46 jyldan keıin ótkizilip otyr. Óte kerek. Jazýshylar odaǵynyń jańa basshylyǵy bastama kóterip, Úkimet qoldap, Azııa jazýshylaryn jınady. Bul óte mańyzdy jıyn. Bas qosý kerek. Tájirıbe almasý kerek», - dedi Qabdesh Jumadilov forým kezinde tilshilerdiń suraǵyna jaýap bere otyryp.

Jazýshynyń aıtýynsha, Azııa elderiniń aqyn-jazýshylary bir-birine tól ádebıetterin nasıhattaýy tıis.

«Bir-birimizdi nasıhattaýymyz kerek. Mysaly, qazaq ádebıeti nasıhat jaǵynan kenje. Aýdarylý jaǵynan da sol. Imperııa tusynda bes-alty ǵana nomenklatýralyq jazýshylar aýdaratyn. Basqalarǵa shek qoıyldy. Endi qazir táýelsizdikten keıin qudaıǵa shúkir, búkil Azııa jazýshylaryn jınap, basyn qosyp jatyrmyz. Olardy biz nasıhattaýymyz kerek. Qazaq ádebıetin olar nasıhattaýy kerek. Búgingi forýmnyń bizge bereri osy ǵoı deımin», - dedi Qabdesh Jumadilov.

Eske salsaq, elordada Azııa qalamgerleriniń І forýmy ótip jatyr. Oǵan ádebıet boıynsha Nobel syılyǵynyń 3 nomınanty qatysýda.

Forým barysynda Prezıdent Qasym-Jomart Toqaev Azııa alyby ádebı syılyǵyn taǵaıyndaýdy usyndy.