Qabanbaı batyrdyń shóberesiniń mazary qaıta jańǵyrdy
ÚRJAR. QazAqparat - Qazaqtyń dańqty batyry, qolbasshy, daraboz Qabanbaıdyń shóberesi Qojaqul Sánik - Aısa Qajy Segizbaıulynyń dúnıeden ótkenine 130 jyl tolýyna oraı mazary qorshalyp, qulpytac qoıyldy. Sondaı-aq, «Maqanshy - Jalańashkól» respýblıkalyq tasjolynyń boıyna kórsetkish taqta ornatylady. Bul týraly «QazAqparat» tilshisine Qabanbaı aýylynyń aqsaqaldar alqasynyń múshesi, zeınetker Muqan Omarǵalıev aqsaqal habarlady.
Aısa Qajy Segizbaıulynyń mazary Shyǵys Qazaqstan oblysynyń Qabanbaı aýylynan 28 shaqyrym jerde ornalasqan.
Aıta keteıik, «Aısa Qajy» mazarynyń janyndaǵy qystaýǵa ornyǵyp, sharýa qojalyǵyn qurǵan qajynyń naǵashysy Ardaq Abdýllauly men almatylyq Aısa Qajynyń shóberesi Keńshilik Qarapauly zıratyn qorshap, qulpytas ornatyp bergen. Qulpytasqa qajynyń ata tegi, týyp ósken jyldary jáne Keńshiliktiń qajy atasyna arnaǵan bir aýyz óleńi jazylypty.
Aısa Qajy (1829-1889) týraly derekter «Seıilhan Jáńginiń shejiresi» atty qoljazbada jazylǵan. Aısa Segizbaıuly - dańqy oıda orys, qyrda qytaıǵa málim bolǵan áıgili batyr, qolbasshy, daraboz Qabanbaıdyń shóberesi.
Aısa babamyz Qojaqul elinen qajyǵa barǵandardyń aldyńǵy tobyna jatady. Aısadan buryn osy elden Dáýik Saýytbaı, Shaǵan Shalaǵyz Mekkege barǵan eken. Aısa qajylyq saparǵa 1850 jyly 21 jasynda barǵan. 1864 jyly 35 jasynda áıgili qytaı-dúńgen soǵysynda aǵasy Ádilbektiń áskerı qosynymen birge Myńbasy sheninde soǵysqa qatysqan. Aısa óz rýynyń asa bedeldi adamy retinde qajydan kelgen soń halyqtyń ıslam dinin ustaýyn jolǵa qoıa bildi, jas balalardyń dinı saýatyn ashty.
«1889 jyly Aısa Qajy qaıtys bolǵan soń urpaqtary osy kúngi Qabanbaı aýylynan 28 shaqyrym jerde ornalasqan Aısanyń qystaýyna súıegin jerlep, segiz qulaqty mazar ornatady. Segiz qabyrǵanyń matematıkalyq dáldikpen soǵylǵan, ár dýaly 5 metrden, jalpy perımetri 70 metr. Aısa babamyzǵa turǵyzylǵan mazar mine, jaýyn-shashynǵa 130 jyl boıy bir kirpishi de ketilmegen, san jyl boıy 60 m/sek jyldamdyqpen udaıy soǵatyn jeline shydas berip qasqaıyp tur. Munyń qupııasy kirpishin eshkiniń erigen maıyna, jylqynyń qyly qosylǵan batpaqtan ılep quıǵandyǵynda jatsa kerek. Qabyrǵa kirpishiniń qalanýyndaǵy baılanystyrylýy osy kúngi ozyq tehnologııalardan bir de kem emes. Al kirpishterdiń arasyn baılanystyryp turǵan suıyqtyqtyń qandaı qupııamen jasalǵany belgisiz. Ol qazirgi tańda tas sııaqty qatyp qalǵan», - deıdi qabanbaılyq Muqan Omarǵalıev aqsaqal.
Muqan aqsaqaldyń aıtýynsha,qaıyrymdy isimen el-jurtyna ónege bolǵan Ardaq Abdýllauly men Keńshilik Qarapauly babalaryna mármár qulpytas qoıýy adamgershilik pen ımandylyq ustanymynyń jalǵasy dep bilgen jón. «Olar bizdi máńgilik óshpes asyl qundylyǵymyzben qaıta qaýyshtyrdy», - deıdi qarııa.
