Qabanbaı aýylynda aýsyl tarady degen aqparat jalǵan - Isaeva
ASTANA. QazAqparat - Qabanbaı aýylynda aýsyl tarady degen aqparat jalǵan. Bul týraly búgin Úkimet úıinde ótken baspasóz máslıhatynan keıin QR Aýyl sharýashylyǵy vıtse-mınıstri Gúlmıra Isaeva málim etti, dep habarlaıdy QazAqparat.
Aıta keteıik, Feısbýk áleýmettik jelisinde Qabanbaı batyr aýylynda sıyrlardan aýsyl shyǵyp, karantın engizilgendigi jáne aýyl turǵyndarynyń iri qara malyn arzanǵa satýǵa tyrysyp jatqandyǵy týraly aqparat taraǵan bolatyn.
Osy máseleniń mán-jaıyn ashyp bergen vıtse-mınıstr: «Zertteý nátıjesinde onyń pasterellez ekendigi anyqtaldy. Ózderińizde biletindeı, osydan úsh jyl buryn bizde problema týyndap, elimizdegi kóp kıikter qyrylyp qalǵan bolatyn. Ol aqbókenderdiń qonys aýdarý jolynda jatyr. Ol jerde pasterellez qozdyrǵyshy bar. Biz bul oshaqty joıýǵa tyrysýdamyz. Biraq munyń aýsylǵa esh qatysy joq», - dedi.
Onyń atap ótýinshe, pasterrelezdiń taralýyna tabıǵı-klımattyq jaǵdaı áser etken. Degenmen, eń basty sebepteriniń biri kıiktermen qatysty bolyp otyr. Sondyqtan da bul problemany túbegeıli sheshý úshin, ıaǵnı pasterellezdiń qaıta órshýine jol bermeý maqsatynda aldyn alý jumystaryn júrgizý qajet.
