Kabananganyń ketýi «Astanany» álsiretti - Stoılov
ASTANA. QazAqparat - "Astana" fýtbol klýbynyń bas bapkeri Stanımır Stoılov Portýgalııanyń "Sportıng" komandasyna qarsy ÝEFA Eýropa lıgasy 1/16 fınaly aıasyndaǵy alǵashqy oıyn jaıly pikir bildirdi, dep xabarlaıdy QazAqparat tilshisi.
Oıyn aldyndaǵy baspasóz máslıxatynda barsha qazaqstandyq jankúıerlerdi jańa fýtbol maýsymynyń betasharymen quttyqtap, bolgarııalyq maman "Astananyń" qazirgi jaǵdaıyna toqtaldy.
"Sportıng" asa tájirıbeli klýb, onyń sapynda kez kelgen sátte gol soǵa alatyn fýtbolshylar bar. "Astanadan" qysqy transferde Kabananganyń ketýi komandany álsiretti. Bul jaǵdaıdy men de jaqsy túsinbedim. Onsyz komanda qalaı oınaıtynyn erteń kóremiz. Bul jaıly qazir, fýtbol merekesiniń aldynda basqa eshteńe aıtqym kelmeıdi. Oıyndy kórelik, sosyn birer pikir aıtýǵa bolar", - deıdi S. Stoılov.
Budan tys, elordalyq komandanyń bapkeri erteńgi oıynda komanda baryn salatynyn aıtyp, komandaǵa jankúıerlerdiń qoldaýy óte qajet ekenin bildirdi.
Eske sala keteıik, oıyn erteń, 15 aqpan kúni 22:00-de "Astana Arena" stadıonynda ótedi.
