Q. Jaqypov: TMD - kóptarmaqty yntymaqtastyqtyń mańyzdy saıası alańy
Bul týraly QR Parlamenti Májilisi Apparatynyń baspasóz qyzmetinen habarlady.
TMD PAA Keńesi otyrysynyń kún tártibinde qaralǵan suraqtardyń biri - Qazaqstannyń 2015 jylǵy TMD-ǵa tóraǵalyǵyna qatysty boldy.
Májilis Spıkeri bizdiń elimizdiń tóraǵalyǵy Qazaqstan Prezıdenti Nursultan Nazarbaev bekitken Tuǵyrnama negizinde júzege asyrylǵanyn atap ótti.
«Tuǵyrnama muragerlik prıntsıpine negizdelip, osyǵan deıin qabyldanǵan halyqaralyq kelisimder men sheshimderdi dáıekti júzege asyrýǵa baǵyttaldy»,-dedi Q. Jaqypov.
Májilis Tóraǵasynyń aıtýynsha, Qazaqstan tóraǵalyǵynda Dostastyq sheńberinde ózara túsinistik pen senimdi nyǵaıtýǵa, sondaı-aq TMD keńistiginde qaýipsizdik pen turaqtylyqty qoldaýǵa baǵyttalǵan bastamalarǵa yqpal etýge basymdyq berildi.
Q. Jaqypovtyń atap ótkenindeı, Uly Otan Soǵysy Jeńisiniń 70 jyldyq mereıtoıyna daıyndalý jáne ótkizý jónindegi negizgi is-sharalar josparyn júzege asyrý tóraǵalyqtyń mańyzdy mindetteriniń biri boldy. Osy rette Májilis Tóraǵasy: «Qazaqstannyń bastamasy boıynsha TMD elderi basshylarynan BUU 70 jyldyǵyna baılanysty jáne halyqaralyq lańkestikke qarsy kúres týraly málimdemeler qabyldandy. TMD qatysýshy-memleketter beıbitshilikti qamtamasyz etý men qaýipsizdik baǵytynda BUU róli aıryqsha ekenin bildirip, sonymen birge, barlyq múddeli memleketter jáne halyqaralyq uıymdarmen lańkestikke qarsy kúreste syndarly is-qımylǵa daıyn ekendikterin kórsetti», - dedi.
Qabıbolla Jaqypov sózin qorytyndylaı kele, Qazaqstannyń tóraǵalyǵy barysynda ózara is-qımyldyń negizgi baǵyttary odan ári nyǵaıa túskenine, TMD-nyń kópqyrly yntymaqtastyqtyń mańyzdy saıası alańy ekeni taǵy bir márte dáleldengenine toqtaldy.
TMD PAA 43-plenarlyq otyrysy kóshi-qon, kásipkerlik jáne jergilikti ózin-ózi basqarý syndy salalardy qamtı otyryp, modeldik zańnamalarǵa qatysty aýqymdy máselelerdi talqyǵa saldy.
