Q. Jaqypov: Parlamentaralyq únqatysý - Qazaqstan men Frantsııa yntymaqtastyǵynyń mańyzdy bóligi
ASTANA. QazAqparat - Májilis Tóraǵasy Qabıbolla Jaqypov Frantsııa Senaty «Frantsııa - Qazaqstan» dostyq tobynyń jetekshisi Andre Dıýle bastaǵan delegatsııa ókilderimen eki jaqty qarym-qatynastyń ózekti máselelerin talqylady. Bul týraly Májilistiń baspasóz qyzmetinen habarlady.
Taraptar eki eldiń parlamentteri arasyndaǵy yntymaqtastyqty odan ári damytý, jalpy alǵanda, Qazaqstan men Frantsııa baılanysyn kúsheıtýge jáne tereńdetýge yqpal etetinine senim bildirdi.
Qabıbolla Jaqypovtyń atap ótkenindeı, Ekonomıkalyq yntymaqtastyq jónindegi úkimetaralyq komıssııa, Іskerlik keńes, sondaı-aq, búgingi kúni júzege asyrylyp jatqan jobalar saýda-ekonomıkalyq, mádenı-gýmanıtarlyq qatynasty damytýǵa aıtarlyqtaı úles qosýda. Olardyń qatarynda Abaı atyndaǵy Qazaqstan Ulttyq pedagogıkalyq ýnıversıteti bazasynda Sorbonna frantsýz ýnıversıtetiniń fılıalynda halyqaralyq qatynastar jáne menedjment eki magıstrlyq baǵdarlama boıynsha mamandar daıyndaýdy atap ótýge bolady.
Májilis Tóraǵasy Frantsııa bizdiń elimizdiń Eýropadaǵy negizgi saıası ári ekonomıkalyq áriptesi ekenin alǵa tarta kelip, ózara yqpaldastyqtyń alda dostyq jáne senim negizinde damýynyń mańyzdylyǵyn alǵa tartty.
Óz kezeginde Andre Dıýle Frantsııanyń Qazaqstanǵa túrli baǵyttarda, sonyń ishinde ındýstrııalyq, agroónerkásiptik damýda, jańa tehnologııalardy tartýda qoldaý kórsetýge daıyn ekenin jetkizdi
Meımandardyń taǵy bir atap ótkeni, bizdiń elimiz «EKSPO - 2017» kórmesin ótkizýge qatysty barlyq suraqtar boıynsha Frantsııanyń qoldaýyna arqa súıeýine bolady.
Ǵalamdyq qaýipsizdik taqyrybyn sóz etkende, Qarýly kúshter jáne qorǵanys, halyqaralyq ister jónindegi Senat komıteti tóraǵasynyń orynbasary Iv Potstso dı Borgo aımaqtaǵy turaqtylyqty qamtamasyz etýde Qazaqstannyń róli aıryqsha ekenine toqtaldy.
