Q. Jaqypov: Depýtattyq zań jobasy balalardy jaǵymsyz aqparattardan qorǵaýǵa jol ashady
ASTANA. QazAqparat - Palata Tóraǵasy Qabıbolla Jaqypovtyń tóraǵalyǵymen ótken Májilistiń jańa jyldaǵy alǵashqy jalpy otyrysynda halyq qalaýlylary «Balalalardy densaýlyǵy men damýyna zııan tıgizetin aqparattan qorǵaý týraly» zań jobasyn ekinshi oqylymda maquldady.
Bul zańdy qabyldaýdyń ózektiligi aqparattyq keńistiktiń jahandaný jaǵdaıynda aqparattyq teris yqpal etýge ushyrap jatatyn balalardyń álsizdigimen túsindirledi.
Qaralyp otyrǵan zań jobasynyń mańyzdylyǵyn alǵa tartqan Qabıbolla Jaqypov qujatty memlekettik tilde ázirlep usynǵan depýtattarǵa alǵysyn jetkize kelip, zań jobasyn qabyldaý óskeleń urpaqty psıhıkalyq zaqym túsirýge, qoǵamǵa qarsy áreketterge jol ashýǵa yqpal etetin aqparattardan qorǵaýǵa jol ashatynyna senim bildirdi.
Zań jobasy túrli jastaǵy balalarǵa arnalǵan aqparattyq ónimderge(baspa, ún-beıne taspa, BAQ basqa da) olardyń psıhofızıologııalyq erekshelikterin esepke ala otyryp arnaıy talaptar bekitýdi qarastyrady.
Zań jobasymen jumys barysynda depýtattar aqparattyq ónimge saraptama júrgizý tetigin bekitýge, sarapshylarǵa qoıylatyn talaptardy belgileýge, sarapshylar men saraptama uıymdaryn akkredıtteý tártibin aıqyndaýǵa, osy salany retteıtin memlekettik organdar quzyretiniń arajigin ajyratýǵa, sondaı-aq, zań jobasynyń jekelegen normalaryn naqtylaýǵa, mazmunyn jaqsartýǵa baǵyttalǵan túzetýler engizdi, dep habarlady Májilistiń baspasóz qyzmetinen.
