Q.Turǵanqulov: Jergilikti máslıhattar depýtattyǵyna 4870 kandıdat usynyldy
ASTANA. QazAqparat - Jergilikti máslıhattar depýtattyǵyna 4870 kandıdat usynyldy. Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov málim etti.
Q.Turǵanqulov máslıhattar depýtattyǵyna kandıdattardy usyný barysy týraly aqparatty usyna otyryp, jergilikti ókildi bılik organdaryna daýysqa túsetin azamattardyń joǵary belsendiligin atap ótti. Onyń aıtýynsha, 2012 jylǵy saılaý naýqanymen salystyrǵanda, bul joly alǵashqy 20 kúnniń ishinde usynylǵan kandıdattardyń sany 2 esege ósken.
«8 aqpandaǵy saǵat 19-00-degi málimetter boıynsha barlyq deńgeıdegi máslıhattar depýtattyǵyna 4870 kandıdat: 581-i - oblystyq máslıhattarǵa, 21-i - Astana máslıhatyna, 95-i - Almaty qalasynyń máslıhatyna usynyldy. Aýdandyq máslıhattarǵa 3244 kandıdat, qalalyq máslıhattarǵa - 929 kandıdat usynyldy», - dedi ol.
OSK basshysynyń derekterine sáıkes, kandıdattardyń 69 paıyzy - er adamdar, 31 paıyzy áıel adamdar. Olardyń 66 paıyzynyń joǵary bilimi bar.
«Okrýgtik saılaý komıssııalary máslıhattar depýtattyǵyna 568 kandıdatty tirkedi», - dep atap ótti Q.Turǵanqulov.
