Q.Turǵanqulov: Saılaýǵa oraı respýblıkada 423 sall-ortalyq ashyldy
ASTANA. QazAqparat - Saılaýǵa oraı respýblıkada 423 sall-ortalyq ashyldy. Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov Qazaqstan Respýblıkasy Prezıdentiniń kezekten tys saılaýyn baıqaý jónindegi EQYU/DIAQB mıssııasynyń basshysy Kornelııa Vıllemıen Anke Ionker hanymmen kezdesý barysynda aıtty.
Kezdesý barysynda Q.Turǵanqulov mıssııa basshysyn saılaý kúnine daıyndyq jumystarymen jan-jaqty tanystyrdy.
«Biz kandıdattarǵa BAQ-tarda tek jaǵdaı jasaý máselesin baqylaýda ustap otyrmyz. Munan bólek, buqaralyq aqparat quraldarynda saılaý zańnamasy normalarynyń buzylýyna jol bermeý úshin turaqty monıtorıng júrgizýdemiz. Saılaýdy uıymdastyrýshylardy jáne saılaý úderisine qatysýshylardy oqytý baǵytyndaǵy jumystardy da atqaryp, saılaýshylar tizimin ózektendirý ári túzetý máselelerin de jiti nazarda ustaýdamyz», - dedi ol.
QR OSK basshysy búgingi tańdaǵy basty mindetterdiń biri árbir saılaýshy úshin saılaý quqyǵyn júzege asyrýǵa múmkindik berý bolyp otyrǵanyn basa aıtty.
«Ol úshin biz barlyq qajetti qadamdardy qabyldap jatyrmyz. Saılaý komıssııalarynyń Halyqqa qyzmet kórsetý ortalyqtarymen ózara is-qımylynyń jańa tetikterin engizip, saılaýshylardyń ózderin saılaýshylar tiziminde bolý-bolmaýyn naqtylaý úderisine belsendi qatysýǵa shaqyrýdamyz. Jergilikti atqarýshy organdar óńirlerde sall-ortalyqtar ashýda. Qazirgi ýaqytta respýblıka boıynsha mundaı 423 ortalyq bar», - dedi Q.Turǵanqulov.
