Q.Turǵanqulov saılaýǵa qatysýshy saıası partııalardy «las» tehnologııalar qoldanbaýǵa shaqyrdy

ASTANA. QazAqparat - Saılaýǵa qatysýshy saıası partııalar «las» tehnologııalar qoldanbaýy tıis. Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov málim etti.

Onyń atap ótýinshe, Ortalyq saılaý komıssııasy 234 kandıdatty qamtıtyn alty saıası partııanyń tizimin tirkedi. Olardyń ishinde 187-si nemese 79,9 paıyzy er adam jáne 47 nemese 20,1 paıyzy áıel adam. 233 kandıdattyń joǵary bilimi bar. Árbir tórtinshisi - ınjener, al árbir besinshisi ekonomıst nemese zańger. 67 kandıdat (28,6 %) memlekettik emes menshik nysanyndaǵy uıymdar men kásiporyndardyń qyzmetkerleri, 47-si (20,1 %) - V shaqyrylǵan Parlament Májilisiniń depýtattary. Tirkelgen kandıdattardyń ortasha jasy - 52 jas, al olardyń eń jasy - 26 jasta.
20 aqpannan saıası partııalar úshin saılaýaldy úgit naýqany bastalady.
«Osyǵan baılanysty biz saılaýǵa qatysýshy saıası partııalar men kandıdattardy, sondaı-aq olardyń saılaýaldy shtabtary men senim bildirilgen adamdaryn adal kúres júrgizýge shaqyramyz. «Las» tehnologııalardy qoldanbaýlary qajet. Ózderiniń úgit-nasıhattyq is-sharalaryn ashyq, ádil jáne transparentti saılaý ótkizý úshin tek qazirgi quqyqtyq alań aıasynda júzege asyrýy tıis», - dedi QR OSK Tóraǵasy.