Q.Toqaevtyń respýblıkalyq qoǵamdyq shtaby qurylady

NUR-SULTAN. QazAqparat - QR Prezıdenttigine kandıdat Qasym-Jomart Toqaevtyń respýblıkalyq qoǵamdyq shtaby qurylady. Bul týraly búgin QR OSK otyrysynan keıin «Nur Otan» partııasy Tóraǵasynyń birinshi orynbasary, kandıdattyń senimdi ókili Máýlen Áshimbaev aıtty, dep habarlaıdy QazAqparat tilshisi.

«Ortalyq saılaý komıssııasynyń otyrysy ótti. Sol otyrysta Qasym-Jomart Kemeluly Toqaevty QR Prezıdenttigine kandıdat retinde tirkeý týraly sheshim qabyldandy. Men Q.Toqaevtyń senimdi ókilimin. Sondyqtan osy otyrysqa Qasym-Jomart Kemelulynyń tapsyrmasymen qatysyp, arnaıy kýálikti aldym. QR Prezıdenti Q.Toqaev osy kúnderi jumys saparymen júrgeni belgili. Ony BAQ kórsetip jatyr. Sol sebepti ózi kele almady. Búgingi otyrysqa qatysýdy maǵan tapsyryp, men qatystym», - dedi ol BAQ ókilderine arnalǵan brıfıngte

Onyń atap ótýinshe, saılaýǵa túsetin kandıdattyń barlyq qujattary Ortalyq saılaý komıssııasyna tapsyryldy. Qajetti sharalardyń barlyǵy atqaryldy.

«Endi búgingi sheshimnen keıin Qasym-Jomart Kemelulynyń respýblıkalyq qoǵamdyq shtaby qurylady. Bizdiń kandıdatymyz osy shtabty basqarýdy maǵan tapsyrdy. Biz kerekti jumystardy bastap ketemiz. Erteń saǵat 11-00-de «Nur Otan» partııasynyń apparatynda BAQ-qa arnalǵan brıfıng ótedi. Sol brıfıngte shtabqa kim kiretindigin, shtab qaı baǵyttarmen jumys isteıtindigin aıtyp beremiz. Zańda kórsetilgen ýaqyttan, ıaǵnı 11 mamyr kúni 18-00-den úgit-nasıhat jumystaryn bastaıtyn bolamyz. Bizdiń úgit-nasıhat jumystarymyz, shtabtyń basqa da jumystary tolyqtaı zań aıasynda júrgiziledi. Sondyqtan osy saılaý ashyq turǵyda ádil ótetindigine eshkimde kúmán joq. Osy baǵytta bizdiń partııa da, Qasym-Jomart Kemelulynyń respýblıkalyq qoǵamdyq shtaby da naqty jumystardy atqaratyn bolady», - dedi Máýlen Áshimbaev.