Q. Toqaev Jenevadaǵy jańa qyzmetine sáýir aıynyń ortasynan kirisedi
ANA. 17 naýryz. QazAqparat /Qanat Mámetqazyuly/ - Birikken Ulttar Uıymynyń Jenevadaǵy bóliminiń bas dırektory bolyp taǵaıyndalǵan QR Parlamenti Senatynyń tóraǵasy Qasym-Jomart Toqaev sáýir aıynyń ortasynda BUU-nyń Bas hatshysy Pan Gı Mýnmen kezdesip, naqty tapsyrmalar alatyn bolady.
Bul týraly búgin QR Parlamenti Senatynyń otyrysynan keıin jýrnalısterge bergen suhbatynda Qasym-Jomart Toqaev ózi aıtty.
«BUU júıesindegi jańa qyzmetimdegi basymdyq negizinen qarýsyzdandyrý máselesine baılanysty bolyp tabylady. Negizinen Jenevada birqatar halyqaralyq uıymdar shoǵyrlanǵan ári osy jerde qarýsyzdandyrý máselesi boıynsha konferentsııa jumys isteıdi. Men osy konferentsııanyń Bas hatshysy bolamyn. Qarýsyzdaný - óte kúrdeli jumys. Óıtkeni ótken 9 jyl boıy osy konferentsııa jumysy eshqandaı naqty nátıje bergen joq. Sol úshin bul maǵan júktelgen óte kúrdeli ári jaýapty mindet»,-dedi Q. Toqaev.
Sonymen qatar Senat spıkeri sáýir aıynyń ortasynda Nıý-Iorkte BUU Bas hatshysy Pan Gı Mýnmen kezdesýi josparlanǵanyn da atap kórsetti. «Osy kezdesý barysynda maǵan naqty tapsyrmalar júkteledi dep kútemin»,-dedi Q. Toqaev.
Aıta keteıik, Qasym-Jomart Toqaev BUU-nyń Jenevadaǵy bóliminiń bas dırektory bolyp taǵaıyndaldy. Bundaı ýaǵdalastyqqa QR Prezıdenti Nursultan Nazarbaev pen BUU Bas hatshysy Pan Gı Mýn telefon arqyly sóılesý kezinde qol jetkizildi. «...Pan Gı Mýn sondaı-aq, BUU júıesindegi basshylyq qyzmetke Qasym-Jomart Toqaevty usyný týraly Qazaqstan Prezıdentiniń usynysyn egjeı-tegjeıli zerttegenin jetkizdi. Jáne halyqaralyq qaýipsizdikti jáne ıadrolyq qarý-jaraqty taratpaý rejımin nyǵaıtýǵa qosqan Qazaqstannyń aıtýly úlesin, eldiń áleýmettik-ekonomıkalyq damýdaǵy jáne syrtqy saıasattaǵy jetistikterin eskere otyryp, Qasym-Jomart Toqaevty BUU-nyń Jenevadaǵy bóliminiń Bas dırektory etip taǵaıyndaý týraly sheshim qabyldaǵanyn aıtty», - delingen QR Prezıdenti baspasóz qyzmetiniń 12 naýryzda taratqan habarlamasynda.
