Q.Toqaev: Prezıdent Joldaýy ekonomıkany jańa sıpattaǵy traektorııaǵa shyǵarady
Joǵarǵy Palatanyń Tóraǵasy óz kózqarasyn «Egemen Qazaqstan» gazetinde beısenbi kúni jarııalanǵan kólemdi suhbatynda aıtqan bolatyn. Osyǵan oraı, palatanyń baspasóz qyzmeti atalǵan suhbattan úzindi taratyp otyr.
Senat spıkeriniń pikirinshe, álem ekonomıkalyq jáne áskerı-saıası jaǵdaı turǵysynan qaraǵanda qaýipti belgisizdik kezeńine aıaq basty. «Prezıdent uzaq ýaqyt boıy Qazaqstannyń osyndaı syrtqy kataklızmderge daıyn turýyn qamdap keldi, alda qıyn kúnder týatynyn eskertip júrdi jáne jańa geosaıası ahýalǵa qaıtarylatyn jaýaptyń stsenarııin oısha juptaýmen boldy», - dep atap ótti spıker suhbatta. Budan bólek, munaı baǵasy joǵary kezdiń ózinde Elbasy Úkimetti dáıim usynyqtylyqqa, únemshildikke shaqyrǵany jáne memlekettik shyǵyndardyń deńgeıi kókeıge qonymdy bolýyn udaıy qadaǵalaǵany aıtylady. «Sondyqtan da qazir Prezıdent Ulttyq qordy «aıqara ashyp» tastaýǵa bolmaıtynyn, ondaǵy qarjy bolashaq urpaqtarǵa tıesili ekenin eskertip otyr. Bizge qazir eń keregi - qaltaǵa qarap ómir súrý, kórpege qarap kósilý», - dep atap ótilgen suhbatta.
«Bıylǵy Joldaýdyń jańalyǵy bul qujattyń bizdiń ekonomıkamyzdy sapalyq turǵydan jańa traektorııaǵa alyp shyǵýdyń is-sharalaryn kózdeıtindiginde. Másele tıimsiz aktıvterdi jekeshelendirýde, salyq salý júıesinde tártip ornatýda, negizsiz beriletin sýbsıdııalardy toqtatýda, básekelestik ortany kúsheıtýde bolyp otyr. Asa kórnekti reformator retinde N.Nazarbaev álemdik daǵdarys kezeńin qurylymdyq jańǵyrtýlar jasaý úshin, ósimniń jańa kózderin izdestirý úshin paıdalanýda. Joldaýdy júzege asyrý bizdiń ekonomıkamyzdy jahandy býyp turǵan daǵdarys belesinen alyp ótýge kepildik berýge tıis. Endigi jerde negizgi eksporttyq shıkizatqa tómen baǵa jaǵdaıynda ósimdi qamtamasyz etý mindet retinde qoıylýda», - dedi Q.Toqaev.
«Sonymen birge, Prezıdent halyqty jan-jaqty qoldaýdyń irgeli mindetin eshqashan umyt qaldyrmaıdy. Bul oraıda densaýlyq saqtaý, bilim berý, áleýmettik qorǵaý, memlekettik qyzmetkerlerdi qoldaý, zeınetaqyny, stıpendııany jáne múgedektigi men asyraýshysynan aıyrylǵanyna baılanysty járdemaqylardy kóbeıtý máseleleri udaıy nazarda turady. Álemde birde-bir el daǵdarys jaǵdaıynda jáne qarjy jetpeı turǵanda áleýmettik kómekti ulǵaıtýǵa táýekel ete alǵan emes. Qazaqstan - osyny jasap otyrǵan el», - dedi Senat Tóraǵasy.
Q.Toqaevtyń pikirinshe, Prezıdent mindettep otyrǵan jańa áleýmettik saıasatta negizgi nazar joǵary sapany qamtamasyz etýge jáne naqty muqtaj adamdarǵa ataýly áleýmettik qoldaý kórsetýge aýdarylýǵa tıis.
Tóraǵa Prezıdent Joldaýy tek halqymyzǵa ǵana emes, búkil álemdik qoǵamdastyqqa arnalǵanyna nazar aýdarady. «Qujat Memleket basshysy jarııa etken aýqymdy ekonomıkalyq baǵdarlamamen qyzǵylyqty. Qazaqstan jekeshelendirýdiń jańa belesine sheteldik ınvestorlardyń qatysýyna múddeli. Bizdiń elimiz memlekettik-jekeshe áriptestiktiń keń múmkindikterin usyna alady, olar ásirese ınfraqurylym salasynda kóp», - dedi Senat basshysy.
«Úkimet pen óńirlik bılik oryndarynyń aldynda shetel ınvestorlaryn tartý jóninde aýqymdy keshendi jumys tur. Biz jańa jahandyq naqty jaǵdaıda jumys isteýge beıimdelip qana qoımaı, búkil álemnen tańdaýly tehnologııany, eń ozyq aqyl-oıdy tartýdy úırenýge tıispiz. Ol úshin tıisti quqyqtyq, ekonomıkalyq jáne mádenı jaǵdaılardy jasaýymyz kerek», - dedi Q.Toqaev.
Tóraǵanyń pikirinshe, Memleket basshysy Qazaqstannyń qaqtyǵysty jaǵdaılardy retteýge múddeliligin, sondaı-aq, bizdiń elimizdiń ıadrolyq qarýsyz álem qurý jolyndaǵy kúreske, terrorızm men ekstremızmge qarsy shyǵýǵa degen yntymaqtastyǵyn naqty aıtty.
Senat Tóraǵasynyń aıtýynsha, Memleket basshysynyń jaqynda túrik áskerı-áýe kúshteri Reseı bombalaýshy ushaǵyn atyp túsirgen tosyn oqıǵaǵa bergen baǵasy, sondaı-aq barlyq talasty máselelerdi qarastyrý jáne shıelenisti báseńdetý úshin ekijaqty komıssııa qurý jónindegi usynysy álemde zor pikir dúrligisin týǵyzdy. «Dúnıejúzindegi bedeldi memleket qaıratkeri bolyp tabylatyn Qazaqstan Prezıdenti osy tosyn oqıǵaǵa oraı dana ári barlyq jaǵynan alyp qaraǵanda ornyqty baılam jasady. Reseı ushaǵy Túrkııaǵa shabýyl jasaǵan joq, onyń maqsaty terrorıstermen kúresý bolatyn», - dep atap ótti Q.Toqaev.