Q.Toqaev: Prezıdent reformalaryn zańnamalyq turǵyda qamtamasyz etý - Senat jumysyndaǵy basym baǵyt

ASTANA. QazAqparat - Qazaqstan Respýblıkasynyń besinshi shaqyrylǵan Parlamentiniń besinshi sessııasynyń ashylýyna oraı Senat Tóraǵasy Qasym-Jomart Toqaev Memleket basshysy Nursultan Nazarbaevtyń ınstıtýttyq reformalaryn zańnamalyq turǵyda qamtamasyz etý máseleleri boıynsha joǵarǵy Palatanyń Bıýro músheleri jáne Apparatynyń basshy qyzmetkerlerimen keńes ótkizdi.

«Jýyrda ótken Konstıtýtsııanyń 20 jyldyǵyna arnalǵan halyqaralyq konferentsııada sóılegen sózinde Prezıdent aldaǵy úsh-tórt jyl ishinde Ult josparyn zańnamalyq qamtý maqsatynda jetpisten astam zań qabyldaý josparlanyp otyrǵanyn, onyń ishinde, jyl sońyna deıin 57 zań qabyldaý qajettigin aıtyp ótti», - dedi Q.Toqaev.

Qalyptasqan erekshe ahýalǵa oraı Q.Toqaev jedeldikti jáne zańdardy joǵary sapada qabyldaýdy qamtamasyz etý úshin Senat komıtetterin Májilistiń tıisti komıtetterimen jáne zań jobalaryn ázirlegen mınıstrliktermen yntymaqtasa qoıan-qoltyq jumys isteýge shaqyrdy. Tóraǵa sondaı-aq Palatanyń qosymsha otyrystaryn ótkizý múmkindikteri týraly da aıtty. Sondyqtan, senatorlardy kásibı biliktilikti, yjdaǵattylyq pen jaýaptylyqty talap etetin aýqymdy zań shyǵarý jumystary kútip tur.

Senat Apparatyna depýtattardyń zańnamalyq qyzmetin jedel ári sapaly quqyqtyq, aqparattyq, uıymdastyrýshylyq jáne qujattamalyq jaǵynan qamtamasyz etý tapsyryldy.

Zań jobalarymen jumysqa basymdyq beriletini eskerile otyryp, komıtetterdiń kóshpeli otyrystary men depýtattardyń issaparlaryn qaıta úılestirý týraly usynys aıtyldy.

Jańa parlamenttik sessııada Senattyń alǵashqy otyrysy 3 qyrkúıekte ótedi.