Q. Toqaev: Ózbekstanmen ekonomıkalyq jáne áleýmettik-gýmanıtarlyq yntymaqtastyqty jalǵastyrýǵa daıynbyz
TAShKENT. ÓzA-QazAqparat - Ózbekstanmen ekonomıkalyq jáne áleýmettik-gýmanıtarlyq yntymaqtastyqtyń barlyq baǵytynda jumysty jalǵastyrýǵa daıynbyz. Ózbekstannyń «ÓzA» ulttyq aqparat agenttigine suhbat bergen QR Prezıdenti Qasym-Jomart Toqaev osylaı aıtty, dep habarlaıdy QazAqparat.
Suhbat barysynda Qasym-Jomart Toqaev Ózbekstandaǵy Qazaqstan jyly aıasynda ótetin sharalarǵa ózbekstandyqtardyń kóptep qatysyp, jyly pikir bildiretindigine úmit artatynyn aıtty.
"Biz úshin Ózbekstannyń árbir turǵyny osynaý ulan-ǵaıyr oqıǵadan ózine qajetti dúnıeni alyp, júrekterinde Qazaqstannyń bir bólshegin máńgi saqtaýy óte mańyzdy. Sondyqtan biz Qazaqstan jyly baǵdarlamasyn barysynsha san alýan ári mazmundy jasaýǵa tyrystyq. Eger bıznesmender men saıasatkerlerge bıznes-forýmdar jáne konferentsııalar aıryqsha qyzyqty bolsa, stýdentterge bilim kórmeleri qaralastyrylǵan. Buǵan qosa, kóptegen mádenı, sporttyq jáne týrıstik sharalar josparlanǵan. Qazaqstan jylynyń geografııalyq qamtýyna erekshe mán beriledi.Іs-sharalar Ózbekstannyń barlyq óńirinde ótetin bolady. Osylaısha biz óńiraralyq kooperatsııany kúsheıtýge, adamı baılanystardy nyǵaıtýǵa úmit artamyz", - dedi Memleket basshysy.
QR Prezıdentiniń atap ótýinshe, saýda, shekara mańy yntymaqtastyǵy, týrızm, kólik jáne mádenıet salalaryndaǵy buǵan deıin halyqqa jarııa etilgen bastamalar men jobalar boıynsha júıeli jumystar jalǵasyn tabady.
"Sonymen qatar bizdiń baqylaý-ótkizý beketterimizdi jańǵyrtýdy aıaqtaýǵa nıettimiz. Bul memlekettik shekarany kesip ótý ýaqytyn aıtarlyqtaı qysqartýǵa múmkindik beredi. Bizdiń maqsatymyz -zamanaýı shekaralyq jáne kedendik ınfraqurylym qalyptastyrý. Bul qarapaıym azamattarǵa, bızneske qajet. Buǵan qosa, mundaı jumys bizdiń elderimizdiń týrıstik áleýetin nyǵaıtýǵa septigin tıgizedi. Bir sózben aıtqanda Ózbekstanmen ekonomıkalyq jáne áleýmettik-gýmanıtarlyq yntymaqtastyqtyń barlyq baǵytynda jumysty jalǵastyrýǵa daıynbyz", - dedi Q.Toqaev.
Osy oraıda QR Prezıdenti munyń barlyǵy ózara túsinistik pen yntymaqtastyqtyń jańa kópirin salýǵa múmkindik beretindigin aıryqsha atap ótti.
"Jaqyn kórshi - nıettes kórshi" («En qўshnım - jon qўshnım») degen ózbek maqaly bar. Ózbekstandaǵy Qazaqstan jyly bizdiń halqymyzdyń arasyndaǵy kóp ǵasyrlyq dostyq ári tatý kórshilik dánekerin nyǵatýǵa qyzmet etetindigine túbegeıli senimdimin", - dedi Memleket basshysy.
