Q.Toqaev: Májilistiń úndeýi Qazaqstannyń keleshegi úshin depýtattardyń joǵary jaýapkershiligin kórsetedi
ASTANA. QazAqparat - QR Parlamenti Májilisi depýtattarynyń Parlament Májilisi men barlyq deńgeıdegi máslıhat deptýattarynyń kezekten tys saılaýyn ótkizý týraly úndeýi Qazaqstannyń keleshegi úshin depýtattardyń joǵary jaýapkershiligin kórsetedi, degen pikirin bildirdi óz suhbatynda Senat Tóraǵasy Qasym-Jomart Toqaev.
- Qasym-Jomart Kemeluly, Májilistiń merziminen tys parlamenttik saılaý ótkizý týraly úndeýine Parlamenttiń joǵarǵy Palatasynyń Tóraǵasy retinde Sizdiń kózqarasyńyzdy bilgimiz keledi.
- Áriptesterimizdiń, Májilis depýtattarynyń bastamasyn tolyqtaı qoldaımyn. Bul olardyń elimizdiń keleshegine degen joǵary saıası jaýapkershiligin kórsetedi. Parlamenttiń de, Úkimettiń de aldynda Elbasy usynǵan mazmuny biregeı strategııa - «Ult josparyn» júzege asyrý boıynsha jumysty úılesimdi túrde jalǵastyrý mindeti tur.
Halyqaralyq ahýal shıelenisip, álemdik naryq myń qubylyp turǵan búgingi jaǵdaıda ishki saıası turaqtylyqtyń mán-mańyzy arta túsedi. Tipti, alpaýyt eldiń basshysy Obama da taıaýda halyqqa arnaǵan úndeýinde búgingi dúrbeleńge toly dúnıede qaterli qaıshylyqtar týyndaǵanda jedel jáne kelisilgen sheshim qabyldaý úshin AQSh-tyń búkil saıası júıesin «jóndeýge» shaqyrdy. Al, bizdiń Elbasymyz ekonomıkalyq ósimge qol jetkizý úshin qoǵamdaǵy yntymaq pen kelisim tujyrymdamasyn baıaǵyda-aq jarııa etip qoıǵany belgili. Búginde álem bul strategııany «qazaqstandyq jol» retinde biledi.
- Biraq álemdi jaılaǵan daǵdarys Qazaqstanǵa da áserin tıgizýde. Bul jaǵdaıdan elimiz az shyǵynmen shyǵa ala ma?
- Negizinen halyqaralyq arenadaǵy qaıshylyqtardan týyndaǵan daǵdarysty bizdiń elimiz sózsiz eńserip shyǵatynyna men kámil senemin. Osyndaı syn sátte Elbasynyń tóńireginde myzǵymastaı toptasyp, jahandyq deńgeıdegi saıasatty ustanýymyz - biz kózdegen tabystyń kepili bolyp tabylady. Daǵdarystar ótedi de ketedi, al halyq birligi - bul máńgilik qundylyq.
Daǵdarys - kúrdeli synaq bolǵanymen, bul jańa múmkindikterdiń de ýaqyty, ári ol bolashaqta oń sheshimder qabyldaý úshin ekonomıkalyq damýdaǵy olqylyqtardy synı kózqaraspen taldaýǵa yqpal etedi. Úkimette ártúrli jaǵdaılardyń aldyn alý úshin birqatar daǵdarysqa qarsy sharalar josparynyń bary qýantady. Senat atqarýshy bıliktiń osy sharalaryn iske asyrýǵa zańnamalyq turǵyda járdem beretin bolady. Meniń oıymsha, qazirgi jaǵdaıda biz halyqaralyq reıtıngke qol jetkizýdi emes, áleýmettik mindettemelerdi oryndaýǵa, ekonomıkany ártaraptandyrýǵa, saıyp kelgende Elbasynyń «Ult josparynan» týyndaıtyn Qazaqstannyń kúsh-qýatyn nyǵaıtýǵa baǵyttalǵan naqty nátıjelerdi basty nazarǵa alýymyz qajet.
