Q. Toqaev: Qazaqstan men Qytaı qatynastardy «nólden» strategııalyq áriptestik deńgeıine kóterdi

Memlekettik Keńestiń Premeri Lı Ketsıanmen áńgime kezinde Q.Toqaev Qazaqstan Qytaımen strategııalyq áriptestik qatynastaryn damytýǵa zor mańyz beretinin atap ótti. Prezıdent Nursultan Nazarbaevtyń bıylǵy qyrkúıekte Hanchjoýdaǵy «Úlken jıyrmalyq» sammıtine sapary, sondaı-aq forým aıasyndaǵy mańyzdy ekijaqty ýaǵdalastyqtarda qol jetken  nátıjeler ony dáleldeı tústi. Q.Toqaevtyń aıtýynsha, bıylǵy qarashada qytaı premeri Lı Ketsıanniń Qazaqstanǵa sapary eki eldiń ónerkásip jáne tehnologııa salalary boıynsha birlesken jobalaryn iske asyrý baǵytynda óte tabysty boldy. Tóraǵa «100 naqty qadam» Ult jospary reformalaryn iske asyrý týraly qytaı tarapyn habardar etti.

Premer Lı Ketsıanniń pikirinshe, Qazaqstan men Qytaıdyń joǵary zań shyǵarý organdary eki el arasyndaǵy zań bazasyn, jemisti yntymaqtastyqty jáne gýmanıtarlyq baılanystardy qalyptastyrýda mańyzdy ról atqardy. Qazaqstandyq senatorlardyń sapary Qazaqstan men Qytaı arasyndaǵy dostyqty odan ári nyǵaıtýǵa jańa úles qosatyn bolady. Lı Ketsıan óziniń taıaýdaǵy Qazaqstanǵa saparynyń nátıjelerin de joǵary baǵalady.

 

QHR Halyqtar jınalysy úıinde Q.Toqaev Halyq ókilderi búkilqytaı jınalysy Turaqty komıtetiniń Tóraǵasy Chjan Detszıanmen kelissóz júrgizdi. Senat Tóraǵasy Qazaqstan Respýblıkasy Táýelsizdiginiń  25 jyldyǵy jáne Qazaqstan men Qytaı arasyndaǵy dıplomatııalyq qatynastardyń ornaǵanyna 25 jyl tolýy qarsańyndaǵy parlamentaralyq kezdesýdiń ereksheligin atap ótti. «Qazaqstan men Qytaı qatynastardy «nólden» strategııalyq áriptestik deńgeıine deıin qalyptastyra aldy. Bul - eki memleket basshylarynyń úlken eńbeginiń nátıjesi», - dedi Q.Toqaev.

Tóraǵanyń aıtýynsha, «Nurly jol» jańa ekonomıkalyq saıasat pen «Bir beldeý, bir jol» bastamasynyń túıisýi kólik, logıstıka, ınfraqurylym, saýda, ınvestıtsııa, mádenı-gýmanıtarlyq jáne ózara is-qımyldyń basqa da salalaryndaǵy birlesken jobalardy iske asyrýǵa yqpal etedi.

HÓBJ Turaqty komıtetiniń Tóraǵasy Chjan Detszıan yntymaqtastyqty odan ári damytý týraly birqatar usynystar aıtty. Eń aldymen, onyń pikirinshe, eki memleketke, ásirese, kúrdeli halyqaralyq ahýaldy eskere otyryp ózara saıası qoldaýdy nyǵaıtý qajet. Birlesken ekonomıkalyq jobalardy júzege asyrý úshin kúsh-jigerdi is júzinde ulǵaıtý mańyzdy. Qytaıda Jibek jolynyń ekonomıkalyq beldeýi men Azııa Infraqurylymdyq ınvestıtsııa bankin qurý týraly Sı Tszınpınniń bastamasyn Qazaqstannyń birinshi bolyp qoldaǵanyn joǵary baǵalaıdy. Chjan Detszıanniń aıtýynsha, Qazaqstan Qytaıdyń Eýrazııadaǵy iri ekonomıkalyq áriptesteriniń birine aınaldy. Qytaı parlamentiniń basshysy gýmanıtarlyq yntymaqtastyqty keńeıtý, ǵalymdardy, oqytýshylar men stýdentterdi almasý qajettigine egjeı-tegjeıli toqtaldy.

HÓBJ Turaqty komıtetiniń Tóraǵasy saıası konsýltatsııalarda, zań shyǵarý salasynda pikir almasýda, yntymaqtastyqtyń ózekti máselelerin talqylaýda parlamentaralyq dıalog mańyzdy arna ekenin atap ótti. Ol Qazaqstanǵa saparmen kelýge shaqyrýdy rızashylyqpen qabyl aldy.

 

Kezdesý barysynda qytaı basshylary Prezıdent N.Nazarbaevqa jáne Qazaqstan halqyna Táýelsizdik mereıtoıyna baılanysty izgi tilekterin joldady.

Beıjińde Senat Tóraǵasy Q.Toqaev Qytaıdyń Ortalyq teledıdarynyń (CCTV) shtab-páterinde bolyp, aǵylshyn tilindegi «Dıalog» baǵdarlamasynyń belgili júrgizýshisi ıAn Jýımen keńinen suhbattasty. Jýrnalısti Qazaqstan men Qytaıdyń saıası jáne ekonomıkalyq baılanystarynyń damý keleshegi, aımaqtyq ekonomıkalyq jáne ınfraqurylymdyq jobalarǵa Astananyń qatysýy týraly Q.Toqaevtyń pikiri qyzyqtyrdy. Odan basqa, Tóraǵa jahandyq geosaıası básekelestiktiń shıelenisýi jaǵdaıynda halyqaralyq jáne aımaqtyq qaýipsizdiktiń ózekti máseleleri týraly óz oılarymen bólisti.