Q.Toqaev Iran Parlamentiniń jáne Reseı Federatsııasy Keńesiniń tóraǵalarymen kezdesti (FOTO)

MÁSKEÝ. QazAqparat - Máskeýde «Eýrazııa óńiri HHІ ǵasyrdaǵy ortaq ıgiligi jolyndaǵy parlamentaralyq yntymaqtastyq» taqyrybynda Eýrazııa memleketteri parlament spıkerleriniń birinshi keńesi bolyp ótti. Jıynda Qazaqstan Respýblıkasy Parlamenti Senatynyń tóraǵasy Qasym-Jomart Toqaev Iran Islam Respýblıkasynyń Islam keńesi májilisiniń tóraǵasy Álı Larıdjanımen kezdesti.

Q.Toqaevtyń ırandyq áriptesimen kezdesýi barysynda taıaýdaǵy QR Prezıdenti N.Nazarbaevtyń Iranǵa resmı saparynyń aıryqsha mańyzy bar ekendigi atap ótildi. Sapar barysynda saýda-ekonomıkalyq salada iri kelisimderge qol jetkizildi.
Taraptar terrorıstik uıymdardyń belsendiligi artýyna baılanysty óńirlik qaýipsizdik máselelerine mán berdi. QR jáne IIR spıkerleri lańkestikpen kúres barysynda óńirdegi eki memleketke úılesken is-qımyldar qajettigin atap ótti.
Q.Toqaev ırandyq parlamentarıılerdi 31 mamyrda Astanada ótetin «Din terrorızmge qarsy» konferentsııasyna qatysýǵa shaqyrdy.
Sonymen birge, Senat tóraǵasy Q.Toqaev Reseı Federatsııasy Keńesiniń tóraıymy Valentına Matvıenkomen kezdesti. Spıkerler álemdegi jaǵdaılar jáne óńirlik yqpaldastyq úderisindegi parlamentaralyq yntymaqtastyqtyń qazirgi jaı-kúıi týraly pikir almasty. 11 mamyrda Federatsııa Keńesiniń tóraıymy Qazaqstanǵa resmı saparmen keledi.