Q. Toqaev: Dinı lıderlerdiń Sezi «Dinı dıplomatııanyń» jahandyq mańyzdy ınstıtýtyna aınaldy
ASTANA. QazAqparat - 1 maýsymda Astanada Beıbitshilik jáne kelisim saraıynda Álemdik jáne dástúrli dinder lıderleriniń Sezi Hatshylyǵynyń XV otyrysy boldy.
Otyrysty asha kelip, Qazaqstan Respýblıkasy Parlamenti Senatynyń Tóraǵasy - Álemdik jáne dástúrli dinder lıderleriniń Sezi Hatshylyǵynyń Basshysy Qasym-Jomart Toqaev kúni keshe ótken «Dinder terrorızmge qarsy» halyqaralyq konferentsııasy Álemdik jáne dástúrli dinder lıderleriniń Sezi qaraǵan kókeıkesti máselelerdiń mańyzdylyǵyn taǵy bir márte pash etkenin atap ótti. Senat Tóraǵasy ótken konferentsııa terrorlyq áreketterge qarsy is-qımyl túrleri men ádisteri týraly túsinikterdi eleýli túrde baıyta túskenin, sondaı-aq bul qatermen kúreste parlamentshiler men dinı qaıratkerlerdiń budan bylaıǵy ózara is-qımyly úshin berik negiz qalanǵanyna senim bildirdi.
Q. Toqaev Hatshylyq músheleriniń qoldaýymen V Sezdiń Deklaratsııasyna Prezıdent N.Nazarbaevtyń «Bes úndeýi» engenin eske saldy. Onda áskerı qaqtyǵystardy toqtatý men tatýlasýdy jarııalaý, saıası qarama-qaıshylyqtardy kúsh qoldaný ádisterinen bas tartý, iri derjavalar arasyndaǵy tereń senimsizdikti joıý, buqaralyq aqparat quraldaryn konfessııaaralyq qaqtyǵystardy tutatýǵa qoldaný tájirıbesin toqtatý, sondaı-aq dinı jáne saıası qaıratkerlerdiń kúsh-jigerin kedeılik, ashtyq, indet, jumyssyzdyq, tabıǵı zilzala men tehnogendik apattardyń ózekti máselelerin sheshý úshin biriktirý týraly sóz bolyp otyr.
Senat Tóraǵasy atap ótkendeı, bul «bes úndeý» Qazaqstan basshysy BUU Bas Assambleıasynyń 70-shi sessııasy barysynda jarııa etken, sondaı-aq áıgili «Álem. HHІ ǵasyr» manıfesinde aıtylǵan bastamalarynda laıyqty damı tústi.
Otyrysqa qatysýshylar Álemdik jáne dástúrli dinder lıderleriniń V Seziniń jáne Sezd Hatshylyǵynyń XIV otyrysynyń qorytyndylary boıynsha pikir almasty.
Hatshylyq músheleri Dinaralyq únqatysýǵa qosqan úlesi úshin Astana halyqaralyq syılyǵyn, Álemdik jáne dástúrli dinder lıderleri Seziniń qurmet medalin taǵaıyndaý, sondaı-aq Beıbitshilik jáne kelisim murajaıyn qurýǵa qatysty máselelerdi qarady.
Álemdik jáne dástúrli dinder lıderleriniń 2018 jyly Qazaqstan Elordasynda bolatyn VI Seziniń taqyryby men kún tártibi boıynsha usynystar talqylandy. Aldaǵy forýmdy «Dinı kóshbasshylar qaýipsiz álem jolynda» taqyrybyna arnaý usynyldy. VI Sezdiń sektsııalyq otyrystary: «Álem. HHІ ǵasyr» manıfesi» jahandyq qaýipsizdiktiń tujyrymdamasy retinde»; «Qubylmaly geosaıasattaǵy din: adamzattyń yntymaǵy úshin jańa múmkindikter»; «Din jáne jahandaný: qaterler men jaýaptar»; «Dinı kóshbasshylar men saıası qaıratkerler ekstremızm jáne terrorızmdi eńserýde» baǵyttary boıynsha ótedi.
Álemdik jáne dástúrli dinder lıderleriniń Sezi Hatshylyǵynyń kezekti XVI otyrysyn 2017 jyly 9 tamyzda Astanada ótkizý týraly sheshim qabyldandy.
Sharany qorytyndylaı kelip, Q. Toqaev bizdiń dáýirimizdiń dramalyq oqıǵalary Astana Sezin «dinı dıplomatııanyń» jahandyq mańyzdy ınstıtýtyna aınaldyratynyn atap ótti.
«Biz taǵy da dinı lıderlerdiń aralasýynsyz zorlyq-zombylyqty joıýdyń jáne qaýipsiz álemdi qurýdyń múmkin emestigine kóz jetkizip otyrmyz, - dedi Tóraǵa. - Biz búgin úlken mazmundy jumystardan basqa, Álemdik jáne dástúrli dinder lıderleri sezin aldaǵy ýaqytta ınstıtýtsıonaldyrý máselesine qaraı ilgeri bet burdyq».
