Q.Toqaev BUU Damý baǵdarlamasynyń 50 jyldyǵymen quttyqtady

ASTANA. QazAqparat - Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Birikken Ulttar Uıymy Bas hatshysynyń kómekshisi, BUU Damý baǵdarlamasynyń Eýropa jáne TMD elderi boıynsha Aımaqtyq bıýrosynyń dırektory Djıhan Sýltanoglýdy qabyldady.

Kezdesý barysynda Q. Toqaev BUUDB ókilin osy qurylymnyń 50 jyldyǵymen quttyqtady. «Damý baǵdarlamasy adamzattyń ornyqty damýyn, onyń ishinde kedeılikti túbirimen joıý, jumyspen qamtýdy ulǵaıtý jáne turǵyndardyń ómir súrý deńgeıin arttyrý, bilim berý júıesin jaqsartý, qorshaǵan ortany qorǵaý jáne qalpyna keltirýdi qamtamasyz etýde ortalyq róldi atqarady». Jıyrma úsh jyl boıy BUUDB Qazaqstandaǵy reformalar men transformatsııalaýǵa eleýli úles qosyp keledi», - dedi Q.Toqaev. Tóraǵa BUUDB jarty ǵasyrlyq qyzmetiniń nátıjeleri men Ornyqty damýdyń 2030 jylǵa deıingi maqsattaryn iske asyrý keleshegi Astana ekonomıkalyq forýmy aıasyndaǵy arnaýly sessııada yqylaspen talqylanatynyna senim artty.

Senat Tóraǵasy sol kúni BUU Bas hatshysynyń arnaýly ókili, BUU Ortalyq Azııa elderine arnalǵan prıventıvtik dıplomatııa jónindegi Aımaqtyq ortalyǵynyń basshysy Petko Draganovpen kezdesý ótkizdi. Júzdesýshiler aımaqtaǵy BUU qyzmetin, ekonomıkalyq yntymaqtastyq, transulttyq qaýipterge qarsy is-qımyl, sondaı-aq «EKSPO-2017» halyqaralyq kórmesine ázirlik máselelerin talqylady.