Q.Toqaev Almatyda aımaqtyq hab negizinde BUU gýmanıtarlyq qurylymdarynyń qyzmetin keńeıtýdi usyndy

ASTANA. QazAqparat - Senat Tóraǵasy Qasym-Jomart Toqaev BUU Bas hatshysynyń gýmanıtarlyq máseleler jónindegi ókili Abdýlla Matýk Al-Matýkty qabyldady.

Senat Tóraǵasy BUU-ǵa qatysty Qazaqstannyń kózqarasy týraly júzdesýshige jan-jaqty áńgimeledi. «Qazaqstan aımaqtyq qaýipsizdikti qamtamasyz etýde eleýli ról atqara otyryp, gýmanıtarlyq saladaǵy halyqaralyq yntymaqtastyqty edáýir ulǵaıtty, ol Aýǵanstan, Sırııa, Pákistan, Ortalyq Azııa elderi jáne ózge birqatar memleketterge kómek berýde kórinis tapty», - dedi ol. Qazaqstan Parlamenti joǵarǵy Palatasynyń Tóraǵasy Almatyda aımaqtyq hab negizinde BUU gýmanıtarlyq qurylymdarynyń qyzmetin keńeıtýdi usyndy.

Tóraǵa sondaı-aq BUU ókiline bizdiń elimizdegi reformalar týraly aıtty jáne kórnekti reformator, ıadrolyq qarýdy taratpaýǵa ári halyqaralyq qaýipsizdikti nyǵaıtýǵa zor úles qosqan memleket qaıratkeri retinde shet elderde jaqsy biletin Elbasynyń kóshbasshylyq rólin atap ótti. Q.Toqaev Álemdik jáne dástúrli dinder lıderleriniń Sezi týraly júzdesýshini egjeı-tegjeıli habardar etti.

A.Al-Matýk BUU Bas hatshysy Pan Gı Mýnnyń izgi tilekterin jetkizdi jáne ıadrolyq qarýdy taratpaý, halyqaralyq qaýipsizdikti nyǵaıtý men dinaralyq únqatysýdy damytý salasyndaǵy Prezıdent N.Nazarbaevtyń halyqaralyq kúsh-jigerine qoldaý bildirdi. BUU Bas hatshysynyń ókili shıelenis saldarynan aýqymy zor gýmanıtarlyq apatqa ushyraǵan Sırııaǵa kómek kórsetý úshin donorlardyń tórtinshi konferentsııasyna ázirlik týraly habarlady. Kýveıt Emıriniń shtattan tys keńesshisi bolyp tabylatyn A.Al-Matýk taıaý arada Sırııa bosqyndary 15 mıllıonǵa jetýi yqtımal dep sanaıdy.

24 qazanda atalyp ótetin BUU-nyń 70 jyldyǵy qarsańynda júzdesýshiler halyqaralyq ózekti máselelerdi retteýdegi osy ámbebap uıymnyń jetekshi rólin nyǵaıtýdyń mańyzdylyǵyn atap ótti.