Q.Toqaev Álemdik jáne dástúrli dinder lıderleri V Seziniń sheshimderin iske asyrý jónindegi jumystardy údetýge shaqyrdy

ASTANA. QazAqparat - Qazaqstan Respýblıkasy Parlamenti Senatynyń Tóraǵasy, Álemdik jáne dástúrli dinder lıderleri Sezi Hatshylyǵynyń Basshysy Qasym-Jomart Toqaev Álemdik jáne dástúrli dinder lıderleri V Seziniń sheshimderin iske asyrý, sondaı-aq osy forýmdy odan ári damytý máseleleri boıynsha jumys babyndaǵy keńes ótkizdi. Sharaǵa syrtqy ister mınıstrligi, mádenıet jáne sport mınıstrligi, Mádenıetter men dinderdiń halyqaralyq ortalyǵy, Senat apparatynyń basshylary qatysty.

Keńeske qatysýshylar Memleket basshysy Nursultan Nazarbaevtyń «Rýhanı tatýlyq pen kelisimdi damytýǵa jáne nyǵaıtýǵa qosqan úlesi úshin syılyǵyn», Álemdik jáne dástúrli dinder lıderleri Seziniń Qurmet belgisin taǵaıyndaý, sondaı-aq Astanada Beıbitshilik jáne kelisim murajaıyn ashý bastamalaryn iske asyrýdyń tujyrymdamalyq jáne uıymdastyrý máselelerin qarady. Q.Toqaev Memleket basshysy men dinı lıderlerge tıisti usynystardy mezgilinde engizý úshin osy baǵytta ázirlik jumystaryn aıaqtaýdy tapsyrdy.

Senat Tóraǵasy 2016 jyldyń ortasynda ótkizý josparlanyp otyrǵan Sezd Hatshylyǵynyń XV otyrysyna jáne Astanada terrorızmge qarsy is-qımylda dinı qaıratkerlerdiń róli týraly konferentsııaǵa tııanaqty ázirliktiń mańyzyn atap ótti. Keńeske qatysýshylarǵa Mádenıetter men dinderdiń halyqaralyq ortalyǵy qyzmetin jetildirý jónindegi usynystar engizý týraly tapsyrma berildi. Senat Tóraǵasy Sezd jáne Hatshylyq otyrystary arasyndaǵy kezeńde forým delegattarynyń turaqty ınteraktıvtik únqatysýyn qalyptastyrý qajettigine nazar aýdardy. Keńeste sóz alǵan mádenıet jáne sport mınıstriniń orynbasary Marat Ázilhanov jáne syrtqy ister mınıstriniń orynbasary Erjan Ashyqbaev V Sezdiń sheshimderin iske asyrý, forýmdarda aıtylǵan bastamalar týraly habardar etti.