Q. Toqaev: Agrarlyq ǵylymdy damytýǵa áli kúnge tıisti deńgeıde kóńil bólinbeı otyr
ASTANA. QazAqparat - Agrarlyq ǵylymdy damytýǵa áli kúnge tıisti deńgeıde kóńil bólinbeı otyr. Bul týraly búgin Parlament Senatynda «EAEO jáne DSU jaǵdaıynda otandyq agrarlyq sektordyń básekege qabilettiligin arttyrý - zańnamalyq retteý jáne is júzine asyrý» atty parlamenttik tyńdaý barysynda Senat spıkeri Qasym-Jomart Toqaev osylaı málim etti.
«Agrarlyq ǵylymdy damytýǵa áli kúnge deıin qajetti deńgeıde kóńil bólinbeı otyr. Al onsyz aýyl sharýashylyǵynyń tıimdiligi men turaqtylyǵyn arttyrý týraly sóz qozǵaý da múmkin emes», - dedi jıyn barysynda sóz sóılegen Senat spıkeri.
Bul rette Tóraǵa aýyl sharýashylyǵyn damytý úshin áli de qosalqy kedergi keltiretin ilespe faktorlardyń bar ekenin atap ótti. «Máselen, aýyldyq aımaqtardaǵy bilikti kadrlardy saqtap, adamdardyń aýyldyq jerlerde jumys isteýge degen qyzyǵýshylyǵyn arttyrý kerek. Bul úshin aýyldyń áleýmettik ahýalyn jetildirý boıynsha sharalar qabyldaý qajet. Qazirgi naryqtyq qatynastarda básekelestik «baǵa - sapa - qyzmet kórsetý» formýlasymen aıqyndalady. Osyǵan baılanysty, aýyl sharýashylyǵy óndirisiniń barlyq tsıkldary agroshıkizatty saqtaý, tasymaldaý jáne qaıta óńdeý boıynsha shyǵyndardy azaıtý jónindegi sharalardy oılastyrý qajet», - dedi Q. Toqaev.
