Q. Saýdabaev «Semeı-Almaty-Astana» velosaıahatyn uıymdastyrýshy «Bike for Peace» qoǵamdyq uıymy ókilderin qabyldady
TANA. 4 tamyz. QazAqparat /Qanat Mámetqazyuly/ -Búgin Aqordada QR Memlekettik hatshysy Qanat Saýdabaev Norvegııanyń Qazaqstandaǵy elshisi Daga Halvorsendi jáne «Bike for Peace» (Beıbitshilik úshin velosıpedke kósh) qoǵamdyq uıymy ótkizýdi josparlaǵan «Semeı-Almaty-Astana» velosaıahat jetekshileri Tore Naerland pen Frank Tomlınsondy qabyldady.
Norvegııalyq «Bike for Peace» qoǵamdyq uıymymen uıymdastyrylatyn shara Qazaqstan Táýelsizdiginiń jáne Semeı ıadrolyq synaq polıgonynyń jabylǵanyna 20 jyl tolýyna oraı 2011 jylǵy 6-29 tamyz aralyǵynda uıymdastyrylmaqshy.
Esterińizge sala keteıik, velotýr Semeı qalasynda 6 tamyzda - 1945 jyly Hırosıma qalasyn bombalaǵan kúni bastalmaq. Tarıhtaǵy osynaý zor qasiret úsh kúnnen soń Nagasakı qalasynda qaıtalanǵan edi. Qazaqstan ıadrolyq qarýǵa qarsy kúreste kóshbasshy eldiń biri bolyp tabylady. Bul rette Qazaqstandaǵy 24 kúndik velosaıahat barysynda oǵan qatysýshylar Shyǵys Qazaqstan, Almaty, Jambyl, Qaraǵandy jáne Aqmola oblystarynda, Almaty men Astana qalalarynda bolmaq. Atalmysh joba Astanada 29 tamyzda, ıaǵnı Semeıdegi synaq polıgony jabylýynyń 20 jyldyǵy kúninde óz máresine jetedi. Bul kún QR Prezıdenti N. Nazarbaevtyń usynysymen jáne BUU Bas Assambleıasynyń biraýyzdan qoldaýymen ıAdrolyq synaqqa qarsy Halyqaralyq kún retinde bekitilgen. Velojoryq osyǵan baılanysty tańdalyp otyr. Velosaıahattyń jeke kezeńderinde «Astana» velokomandasynyń keıbir músheleri de buǵan qatysatyny kútiledi.
«Aǵymdaǵy jyly Memleket basshysynyń jarlyǵymen álemdegi eń iri Semeı ıadrolyq synaq polıgonynyń jabylýyna 20 jyl tolady. N. Nazarbaev keńes úkimeti basshylarynyń qalaýlaryna qaramastan osy kúrdeli sheshimdi qabyldaý arqyly óziniń aıyryqsha erligin tanytty. Sol ýaqyttan beri Qazaqstan jáne onyń Lıderi ǵalamdyq ıadrolyq qarýdy qysqartý jáne taratpaý úrdisiniń belsendi jaqtaýshysy bolyp tabylady. BUU-nyń Semeı polıgony jabylýynyń resmı kúnin - 29 tamyzdy ıAdrolyq synaqtarǵa qarsy halyqaralyq is-qımyl kúni dep jarııalaýy halyqaralyq qaýymdastyqtyń elimizdiń ustanymyn qoldaıtynyn aıǵaqtaıdy. Al «Semeı-Almaty-Astana» velosaıahat jarysy ıadrolyq qarýǵa qarsy mańyzdy áreketke aınalatynyna senimim mol», - dedi Q. Saýdabaev.
