Q.Saýdabaev: «Bolashaq» túlekteri elimizdiń áleýmettik-ekonomıkalyq, ındýstrıaldy-ınnovatsııalyq damýyna úles qosýda
ASTANA. 21 jeltoqsan. QazAqparat /Marlan Jıembaı/ - Búginde «Bolashaq» túlekteri elimizdiń áleýmettik-ekonomıkalyq, ındýstrıaldy-ınnovatsııalyq damýyna úles qosýda, dep atap ótti QR Memlekettik hatshysy Qanat Saýdabaev Shetelde kadrlar daıarlaý jónindegi respýblıkalyq komıssııa otyrysy barysynda.
Táýelsizdiktiń 20 jyly ishinde elimizde bilim men ǵylymdy qarjylandyrý artyp, zamanaýı mektepter júıesiniń keńeıtilgendigin, halyqaralyq standarttarǵa saı Nazarbaev Ýnıversıtetiniń ashylǵandyǵyn basa aıtqan ol: «Táýelsizdiktiń alǵashqy jyldaryndaǵy ekonomıkalyq qıynshylyqtarǵa qaramastan, Prezıdent shet elderdiń úzdik ýnıversıtetterinde jańa býyn kadrlaryn daıyndaýda mańyzdy ról oınaǵan «Bolashaq» baǵdarlamasyn qurdy», - dedi.
Sonymen, aǵymdaǵy jyldyń 1 qyrkúıegi men 8 jeltoqsany aralyǵynda ótkizilgen konkýrstyq irikteýdiń 1 jáne 2 kezeńderiniń nátıjeleri boıynsha 389 azamat «Bolashaq» baǵdarlamasynan úmitti bolsa, onyń 159-y Ulybrıtanııada, 91-i AQSh-ta, 34-i Reseıde, 19-y Germanııada oqýǵa qujat tapsyrǵan. Al qalǵan úmitkerler Frantsııa, Italııa, Avstralııa, Qytaı, Nıderlandy, Norvegııa, Chehıa, Kanada, Slovakııa, Avstrııa, Shveıtsarııa elderin tańdaǵan. Olardyń 238-i magıstratýraǵa, 2-eýi doktorantýraǵa, al 59-y ǵylymı taǵlymdamaǵa qujat tapsyrǵan.
