Q. Sátbaev atyndaǵy ýnıversıtette jańa fýtbol alańy ashyldy

ALMATY. Mamyrdyń 6-y. QazAqparat /Názıra Eleýhan/ - Búgin Almatyda Elbasy Joldaýyn iske asyrý maqsatynda, sondaı-aq Jeńistiń 65-jyldyq mereıtoıyna oraı Q. Sátbaev atyndaǵy Qazaq ulttyq ýnıversıtetinde jańa sport alańynyń ashylý saltanaty ótti,

dep habarlaıdy QazAqparat.

«Elbasy halyqqa Joldaýynda basymdylyqtardyń eń bastysy retinde ulttyń densaýlyǵyn atap ótken bolatyn. Biz osy mańyzdy máselege úlken mán beremiz. Joldaýdy iske asyrýdaǵy bul bastapqy sharalar. Aldaǵy ýaqytta úlken ekiqabatty sporttyq keshendi ashýdy josparlap otyrmyz. Bizdiń mindetimiz - jastardy meılinshe kóbirek sportqa baýlý, salaýatty ómir saltyn nasıhattaýǵa shaqyrý», dep atap ótti QazUTÝ rektory Jeksenbek Ádilov.

Ashylý saltanaty aıasynda munda fýtboldan QazUTÝ kýbogy úshin ýnıversıtetaralyq jarys ótti. Oǵan 10 komanda qatysty. Birinshi oryndy alań ıeleri - QazUTÝ quramasy jeńip aldy. Ekinshi oryndy S.Asfendııarov atyndaǵy Qazaq ulttyq medıtsınalyq ýnıversıtetiniń komandasy ıelendi. Al Abaı atyndaǵy Qazaq ulttyq pedagogıkalyq ýnıversıtetiniń komandasy úshinshi oryndy qanaǵat tutty.

QazUTÝ-diń oqý jáne tárbıe jónindegi prorektory Luqpan Sydyqovtyń aıtýynsha, bul shara jastardyń densaýlyǵyn nyǵaıtýǵa, sportqa degen yntalaryn arttyrýǵa, sonymen qatar jastardyń dene tárbıesi men adamgershilik qasıetterin baýlýǵa múmkindik beredi. «Biz búgingi zamanǵa saı jabdyqtalǵan alańnyń ashylǵanyna qýanyshtymyz. Ýnıversıtette 34-ten asa sport sektsııalary, ár túrli zaldar bolǵanymen, bizde fýtbol alańdary az jetispeýshi edi», deıdi ol.