Q. Sátbaev atyndaǵy ulttyq ýnıversıtet elimizdegi búkil tehnıkalyq ýnıversıtetterdiń naǵyz ortalyǵyna aınalýy qajet - J. Túımebaev
Y. Qarashanyń 13-i. QazAqparat /Ádilet Musahaev/ - Elimizdiń bolashaǵy ekonomıkalyq damýy jáne halyqtyń ál-aýqatynyń jaqsarýy - tikeleı ınjenerlik ǵylymnyń damý nátıjesi.
Bul jaıynda QR Bilim jáne ǵylym mınıstri Janseıit Túımebaev Almatyda bolǵan «Shekarasyz ǵylym men ınjenerlik bilim» halyqaralyq forýmynda málim etti, dep habarlaıdy QazAqparat.
«Elbasymyz N. Nazarbaev búgingi Qazaqstannyń álemdik qaýymdastyqta óz ornyn alýynda tehnıka ǵylymynyń erekshe ornyn atap ketken bolatyn. Osy oraıda Q. Sátbaev atyndaǵy Qazaq ulttyq tehnıkalyq ýnıversıtetiniń elimizdiń ekonomıkasyn damytýdaǵy orny erekshe dep aıtar edim. Qazirgi tańda Almaty qalasynda ornalasqan ulttyq ýnıversıtet, elimizdegi búkil tehnıkalyq ýnıversıtetterdiń naǵyz ortalyǵyna aınalýy qajet. Qazir sizder men bizderge joǵary talap qoıyldy, sol talapqa oraı sapaly bilim berý, sapaly mamandar daıarlaý - barlyǵymyzdyń ortaq maqsatymyz. Elbasymyzdyń qoıyp otyrǵan joǵary talabyn birlese óteýimiz qajet jáne jumysty jańa talapqa saı qoıýymyz kerek», deıdi mınıstr.
