K.Saǵadıev: Salyq Zımanov - qazaq tarıhyn da tereń zerttegen zańger
ASTANA. QazAqparat - Búgin Ulttyq akademııalyq kitaphanada zań ǵylymdarynyń doktory, professor, QR Ulttyq ǵylym akademııasynyń akademıgi Salyq Zımanovtyń 95 jasqa tolýyna oraı «Akademık Zımanov - ǵalym, azamat jáne ǵylym abyzy» taqyrybynda dóńgelek ústel ótti.
Búginde S.Zımanovtyń zertteýleri Qazaqstan men Orta Azııa respýblıkalarynda saıası tarıh pen saıası-quqyqtyq ǵylymǵa qosqan qomaqty úlesi retinde baǵalanyp otyr.
«Ómiriniń sońǵy saǵatyna deıin birge bolǵan aǵamyz edi. Qazaq ǵylymyna, sonyń ishinde, zań ǵylymyna, ulttyq ǵylym akademııasyna sińirgen eńbegi erekshe. Egemendikti endi alǵan kezde táýelsiz Qazaqstannyń zań ǵylymynyń negizin qalaǵan ǵalymdardyń biregeıi de - Salyq Zımanov»,-deıdi dóńgelek ústeldi ashqan ekonomıka ǵylymdarynyń doktory, professor, QR UǴA akademıgi Kenjeǵalı Saǵadıev.
S.Zımanov qazaq tarıhyn da tereń zerttegenin aıta kele K.Saǵadıev: «Alash azamattary týraly da talaı estelik, derekterdi Salyq Zımanov aǵamyzdan estigen edim»,-dep eske aldy.
Salyq Zımanov qoǵam jáne memleket qaıratkeri, zańger, zań ǵylymdarynyń doktory professor, Qazaqstan Respýblıkasy Ulttyq ǴA-nyń akademıgi, Qazaqstan Respýblıkasynyń eńbek sińirgen Ǵylymı qaıratkeri. 3ımanov óziniń «Qazaqtardyń 19 ǵ-dyń 1-jartysyndaǵy qoǵamdyq qurylysy», «Qazaqstannyń 18 ǵasyrdyń sońy men 19-dyń alǵashqy jartysyndaǵy saıası qurylysy» atty eńbekterinde jáne «Abaı erejeleri» atty Ǵylymı maqalasynda Abaıdyń qazaq tarıhyndaǵy alatyn ornyna joǵary baǵa berip, qazaqtardyń ádet-ǵuryp zańdaryn jetildirýge qosqan úlesi men pravolyq kózqarastaryn saralady.
