K-pop Ońtústik Koreıaǵa rekordtyq deńgeıde týrıst tartyp otyr
ASTANA. KAZINFORM — Bıyl Ońtústik Koreıa bıligi elge keletin sheteldik týrıster sany alǵash ret 20 mıllıonnan asyp, jańa rekord ornatamyz dep otyr, dep habarlaıdy Kazinform agenttigi The Korea Times basylymyna silteme jasap.
Koreıa Respýblıkasynyń Mádenıet, sport jáne týrızm mınıstrliginiń aldyn ala derekterine súıensek, osy aptanyń basynda elge kelgen sheteldik týrıster sany 18,91 mıllıonǵa jetken. Bul kórsetkish byltyrǵy rekord 18,94 mıllıonǵa jaqyn.
Mınıstrlik qarasha aıynda elge taǵy 1,94 mıllıon týrıst keledi dep kútedi. Eger qazirgi úrdis jalǵasa berse, qarashanyń úshinshi aptasynda 20 mıllıondyq meje baǵyndyrylady.
Byltyrǵy rekordqa jyl aıaqtalýyna eki aı qalǵanda jetý eldi úkimettiń jylyna 23 mıllıon sheteldik týrıst tartý maqsatyna jaqyndatady. Bılik Ońtústik Koreıanyń týrıstik tartymdylyǵynyń artýyn koreı pop-mádenıetiniń búkil álemge tanymal bolýymen, damyǵan týrızm ındýstrııasymen jáne halyqtyń qonaqjaılylyǵymen baılanystyrady.
Qytaı, Japonııa, Ońtústik-Shyǵys Azııa, Eýropa jáne Amerıka sııaqty negizgi naryqtardyń kópshiliginde týrıstik aǵyn artqan. Týrıster Koreıanyń Seýlden basqa óńirlerine de kóptep kele bastaǵany aıtylady.
Sheteldik týrısterdiń shyǵyndary ótken jyldyń sáıkes kezeńimen salystyrǵanda 47,7%-ǵa ósti. Negizgi shyǵyndar saýda, turý, medıtsınalyq jáne saýyqtyrý qyzmetteri boldy.
Eske sala keteıik, qazanda Ońtústik Koreıanyń BTS toby Spotify platformasynda rekord ornatty.
Ońtústik Koreıa qoǵamdyq oryndardy kúzetýge tórt aıaqty robottardy qoldanady.
