K. Másimovtiń tóraǵalyǵymen «Samuryq-Qazyna» AQ Dırektorlar keńesi músheleriniń otyrysy ótti
ASTANA. 7 sáýir. QazAqparat - Keshe QR Premer-Mınıstri Kárim Másimovtiń tóraǵalyq etýimen «Samuryq-Qazyna» ulttyq ál-aýqat qory» AQ Dırektorlar keńesiniń kezekti otyrysy ótti.
Atalǵan qordyń málimetine qaraǵanda, otyrys barysynda «Samuryq-Qazyna» AQ-nyń 2012-2022 jyldarǵa arnalǵan damý strategııasynyń jobasy qaraldy. Osy másele boıynsha qordyń basqarmasy tóraǵasynyń orynbasary Qýandyq Bıshimbaev baıandama jasady. «Samuryq-Qazyna» ulttyq ál-aýqat qory» aktsıonerlik qoǵamynyń 2012-2022 jyldarǵa arnalǵan damý strategııasynyń jobasy «Memlekettik josparlaý júıesi týraly» Qazaqstan Respýblıkasy Prezıdentiniń 2009 jylǵy 18 maýsymdaǵy № 827 Jarlyǵyna sáıkes daıarlandy, oǵan saı ulttyq basqarýshy holdıngterdiń, ulttyq holdıngterdiń, ulttyq kompanııalardyń damý strategııalary Qazaqstan Respýblıkasynyń strategııalyq jáne baǵdarlamalyq qujattarynyń negizinde 10 jylǵa ázirlenedi.
Strategııa jobasynda «Samuryq-Qazyna» ulttyq ál-aýqat qory» aktsıonerlik qoǵamynyń mıssııasy, strategııalyq damý baǵyttary, 10 jyldyq damý kezeńine arnalǵan maqsattary men mindetteri belgilengen.
Sondaı-aq otyrys barysynda «Samuryq-Qazyna» ulttyq ál-aýqat qory» aktsıonerlik qoǵamynyń enshiles jáne táýeldi uıymdarynyń aktsııalar paketterin baǵaly qaǵazdar naryǵyna (Halyqtyq ІRO) shyǵarý baǵdarlamasyn iske asyrý máseleleri jáne «Samuryq-Qazyna» AQ turǵyn úı qurylysy baǵdarlamasyn bekitý, sondaı-aq QR Ulttyq qorynyń qaıtarymdyq qarajaty esebinen «Samuryq-Qazyna» jyljymaıtyn múlik qory» AQ nesıe jelisin berý máseleleri qaraldy.
Kadr máseleleri aıasynda «Samuryq-Qazyna» AQ Basqarma tóraǵasynyń orynbasary Q. Bıshimbaevtyń «Birikken hımııa kompanııasy» JShS Qadaǵalaý keńesiniń múshesi laýazymyn ıelenýine kelisim berildi.
Budan bólek, qor qyzmetiniń basqa da máseleleri qaraldy, olar boıynsha tıisti sheshimder qabyldandy.
