K.Másimov jerasty sýlardy paıdalaný áleýetin arttyrýdy tapsyrdy
ASTANA. 29 qańtar. QazAqparat /Arman Asqarov/ - Mınıstrler kabınetiniń búgingi otyrysynda QR Premer-Mınıstri Kárim Másimov elimizde turǵyn úı -kommýnaldyq sharýshalyqty damytý boıynsha jańa baǵdarlamany ázirlep, sáýirdiń 1-ine deıin Úkimettiń qaraýyna engizýdi tapsyrdy.
Bul tapsyrma QR Qurylys jáne turǵyn úı -kommýnaldyq sharýashylyq isteri jónindegi agenttikke júkteldi. «Bizde bar baǵdarlamany jańa qujattyń negizi retinde alý kerek. Prezıdenttiń bergen tapsyrmalaryn eskere otyryp, ony tek tolyqtyrý qajet», - dedi K.Másimov. Sondaı-aq Úkimet basshysy turǵyn úı jáne kommýnaldyq nysandardy jóndeý jumysyn azamattar men jeke ınvestorlardyń qarjylandyrý mehanızmi boıynsha tıisti usynystardy bir aıdyń kóleminde Úkimettiń qaraýyna engizýdi tapsyrdy. «Al sý sharýashylyǵyna jeke ınvestıtsııalar tartý boıynsha QR Indýstrııa jáne jańa tehnologııalar mınıstrligimen birlese otyryp, jerasty sýlardy paıdalaný áleýetin arttyrýdy tapsyramyn», - dedi K.Másimov
