K.Másimov: Shaǵyn qalalardyń damý qarqyny tómendeýi yqtımal
ASTANA. QazAqparat - Shaǵyn qalalardy damytý baǵdarlamasyna ózgertýler engiziledi. Bul týraly búgin QR Parlamenti palatalarynyń birlesken otyrysynda atalǵan máselege oraı depýtattardyń saýalyna jaýap bergen QR Úkimet basshysy Kárim Másimov málim etti.
Onyń atap ótýinshe, taıaýda bul máselege oraı selektorlyq rejimde Úkimet otyrysy ótip, oǵan Mınıstrler kabınetiniń músheleri, shaǵyn qalalardyń ákimderi qatysqan.
«Biz bul baǵdarlamanyń oń jáne kemshin tustaryn qaradyq. Oń tusy, bul baǵdarlama bar jáne biz shaǵyn qalalardy dalada qaldyrmadyq ári olarǵa qoldaý kórsetýdemiz. Al kemshin tusy resýrstardyń basym bóligi atalǵan qalalardaǵy turǵyn úı kommýnaldyq sharýashylyǵyn, ınfraqurylymdardy damytýǵa jumsalǵan. Kásipkerlikti damytýǵa, olardyń belsendigin arttyrýǵa jete nazar aýdarylmaǵan. Bul másele oblys ákimderine eskertildi. Menińshe, naqty túzetýler bar jáne bul baǵdarlamanyń ákimshilenýine engiziletin bolady», - dedi Úkimet basshysy.
Sonymen qatar ol ekonomıkalyq ahýaldyń ózgeriske ushyraýy ónerkásiptiń damýyna áser etetindigin atap ótti. Sonyń saldarynan jańa shaǵyn qalalardyń damý qarqyny tómendeýi yqtımal.
«Óıtkeni, bizder eksportqa shyǵaryp úırenip qalǵan kóptegen taýarlardyń álemdik ekonomıkadaǵy suranysy tómendeýi múmkin. Ekonomıkalyq konıýnktýranyń ózgerýi bizge de áser etedi. Sondyqtan biz Úkimet jumysy aıasynda depýtattarǵa ótinish jasaıtyn bolamyz. Shaǵyn qalalarmen jumysty qaıta qarap, túzetý engizýge de týra kelýi múmkin», - dedi Premer-Mınıstr.
