K.Másimov polıtseıler men memlekettik qyzmetkerlerdi kásibı merekelerimen quttyqtady
TALDYQORǴAN. QazAqparat - QR Premer-Mınıstri Kárim Másimov Almaty oblysyna jumys sapary barysynda qoǵam ókilderimen kezdesip, polıtseıler men memlekettik qyzmetkerlerdi olardyń kásibı merekeleri - Polıtsııa kúnimen jáne Memlekettik qyzmetkerler kúnimen quttyqtady. Bul týraly Premer-Mınıstrdiń resmı saıty habarlady.
Oqýshylar saraıyna barǵan sátinde K.Másimov kórme galereıasyn, keme jasaý synyby men oıyn zalyn aralady. Sonymen qatar, Premer-Mınıstr Juldyzdy zal men sándik-qoldanbaly ónerge arnalǵan kórme galereıasyna bardy.
Oqýshylar saraıyn aralaǵan soń Úkimet basshysy oblystyń qoǵam ókilderimen kezdesý ótetin úlken kontsert zalyna bet aldy, onda eń aldymen elimizdiń barlyq polıtseıleri men memlekettik qyzmetkerlerin kásibı merekelerimen quttyqtady.
