K.Másimov memorgandarǵa Qaraǵandy oblysyndaǵy túıneme indeti taralý oqıǵasyn baqylaýda ustaýdy tapsyrdy

ASTANA. QazAqparat - Qazaqstan Premer-Mınıstri Kárim Másimov Qaraǵandy oblysynda túıneme aýrýynyń taralýyna baılanysty jaǵdaıdy kúndelikti nazarynda ustap otyrady, dep habarlady QR Premer-Mınıstriniń baspasóz qyzmeti.

Búgin UEM Tutynýshylardyń quqyqtaryn qorǵaý komıteti tóraǵasynyń orynbasary - QR Bas memlekettik sanıtarlyq dárigeri Jandarbek Bekshın kezekti baıandama barysynda «sońǵy táýlikte halyq arasynda aýrý juqtyrýdyń jańa jaǵdaıy tirkelmegenin málimdedi».

Sonymen qatar, arnaıy shtab jumys isteýde, aýylda karantın jarııalandy, «aýyldan mal, ónimniń syrtqa shyǵýyna» tyıym salyndy. Jaǵdaı baqylaýda, barlyq úı-jaı, baılanys anyqtaldy. Hımııalyq aldyn alý, antıbıotıkterapııa júrgizilýde», - dep málimdedi QR bas sanıtarlyq dárigeri.

Baıandama sońynda Kárim Másimov Ulttyq ekonomıka, Aýyl sharýashylyǵy mınıstrlikterine jergilikti organdarmen birlesip, ınfektsııanyń taralýynan halyqty qorǵaý boıynsha belsendi jumystardy jalǵastyrýdy tapsyrdy. Birinshiden, indet odan ári taralmaý úshin adamdardy qorǵaýdy qamtamasyz etý qajet. Ekinshi mindet - elde mundaı jaǵdaı bolmas úshin sharalar kesheni qajet. Bul máseleni turaqty baqylaýda ustaýǵa jeke tapsyrma beremin, - dedi Másimov.

Premer-Mınıstr kelesi aptada jumys saparymen Qaraǵandy oblysyna baryp, jaǵdaımen tanysatynyn atap ótti. Osy máselege oraı arnaıy májilis ótkiziledi.

Eske salsaq, 19-22 maýsym aralyǵynda Qaraǵandy oblysy Shet aýdany Erkindik aýylynda 9 adam túıneme juqtyrdy degen kúdikpen aýrýhanaǵa jatqyzylǵan. Olardyń ekeýi qaza tapty.