K. Másimov: Halyqty birinshi kezekte qaýipsizdik tolǵandyryp otyr
ASTANA. QazAqparat - Halyqty birinshi kezekte qaýipsizdik tolǵandyryp otyr, biz osy baǵyttaǵy jumysty kúsheıtetin bolamyz. Búgin QR Parlament palatalarynyń birlesken otyrysy barysynda QR Úkimetiniń 2015 jylǵy respýblıkalyq bıýdjettiń atqarylýy týraly esebin talqylaý barysynda QR Premer-Mınıstri Kárim Másimov osylaı málim etti.
«Búgingi múmkindikti paıdalana otyryp, Elbasynyń tapsyrmasy boıynsha Aqtóbe oblysyna saparyma toqtala ketkim keledi. Meniń oıymsha, búgingi kúni halyqty eń birinshi kezekte qaýipsizdik máselesi tolǵandyrady. Buǵan deıin, halyq negizinen baspana máselesine, sýǵa, gazǵa qatysty tarıfterge, azyq-túlik máselesine nazar aýdaryp kelse, qazir jurtty eldiń ishki qaýipsizdigi tolǵandyratyny anyq bilinip otyr», - dedi K. Másimov.
Osyǵan oraı, Úkimet basshysy Elbasynyń tapsyrmasyna sáıkes, jumys toby qurylǵanyn atap ótti. «Aldaǵy ýaqytta biz arnaýly organdar men quqyq qorǵaý organdarynyń múmkindikterin tolyq qamtamasyz etý baǵytynda zańnamalyq jáne birqatar resýrstyq ózgerister boıynsha Parlamentke keletin bolamyz. Qazaqstan azamattary ózderiniń ómiri memleket tarapynan qorǵalatynyna senimdi bolýy kerek. Biz osyny qamtamasyz etetin bolamyz», dedi K. Másimov.
