K.Másimov basqarǵan Úkimet halqyna adal qyzmet etip, Elbasynyń, eliniń senimin aqtady - N.Ónerbaev
ASTANA. 8 sáýir. QazAqparat /Marlan Jıembaı/ - K.Másimov basqarǵan Úkimet halqyna adal qyzmet etip, el senimin aqtady.
Bul pikirdi búgin QR Parlamenti Májilisiniń jalpy otyrysynda Elbasy Premer-Mınıstr laýazymyna K.Másimov kandıdatýrasyn usynǵannan keıin depýtat Nurlan Ónerbaev bildirdi.
«Búgin tarıhı kún. Tebireniske toly aıryqsha aıshyqty kún, - dep bastady sózin Májilis depýtaty N.Ónerbaev. - Memleketimizdiń taǵy bir onjyldyǵynyń jańa paraǵy búgin ashylyp otyr. Mundaıda atam qazaq «altyn aıdarly ulyna aqsarbas» aıtyp, tolaıym kóńilden aq tilegin aqtaryp jatady. Osy dástúrdi saqtaı otyryp, búkil álemdi tańdaı qaqtyrarlyq tabysyńyz ben iri jeńisińiz uzaǵynan súıindirsin, qurmetti Nur aǵa! Siz osy 20 jyl ishinde talaı belesterdi baǵyndyrdyńyz. Elimizdiń abyroıyn asqaqtatyp, tórtkúl dúnıege pash ettińiz. Memleketimizdi jańa damý jolyna túsirdińiz. Osyndaı ıgi isterdiń budan da ári de órkendeı berýine shyn júrekten tilektespiz. Búgin Qazaqstan men sizdiń esimińiz qatar aıtylady. Óıtkeni táýelsizdigimizdiń 20 jylynda Sizdiń bastaýyńyzben Qazaq eli tórtkúl dúnıege áıgili, álemniń básekege qabiletti 50 eliniń qataryna qosylýǵa tolyq múmkindigi bar, irgeli de ekonomıkasy qýatty elge aınalyp otyr. Sizdiń orasan zor tájirıbeńiz, ómirlik danalyǵyńyz ben sarqylmas kúsh qýatyńyz áli uzaq jyldar boıy Qazaqstan halqynyń múddesi jolynda qyzmet etetine senimimiz mol».
Osydan keıin Elbasynyń Prezıdenttik jańa merzimindegi jumysyn Parlament Májilisinen bastap otyrǵan jaqsylyqqa jorıtyndyqtaryn jetkizgen ol: «Búgin mine Úkimet basshysyn usynyp otyrsyz. Úkimet basshysyn el 2007 jyldan beri biledi. Elimizge, halqymyzǵa adal qyzmet etip kele jatqan azamat retinde biledi», - dedi.
Halyq qalaýlysynyń atap ótýinshe, 2007 jyldan beri elimizdegi ekonomıkalyq, áleýmettik jáne ındýstrııalyq damý qarqyndy ósip, dúnıejúzilik qarjylyq daǵdarystan Qazaqstan Respýblıkasy birinshilerdiń qatarynda bolyp shyqty. Mine, osynyń barlyǵy Úkimettiń adal qyzmet etýine tikeleı baılanysty.
«Kárim Qajymqanuly osy kúnge deıin ózińizdiń jáne halyqtyń senimin aqtady. Budan bylaı da aqtaıdy dep, adal qyzmet etedi dep senim bildiremiz jáne qoldaımyz», - dedi N.Ónerbaev.
