K. Másimov áýejaılar men vokzaldardy qazirgi zamanǵy tekserý júıesimen jabdyqtaýdy tapsyrdy

ASTANA. QazAqparat - QR Premer-Mınıstri Kárim Másimov áýejaılardy, temirjol jáne avtobýs vokzaldaryn qazirgi zamanǵy tekserý júıesimen jabdyqtaýdy tapsyrdy. Bundaı tapsyrmany ol búgin Úkimet otyrysynda júktedi.

«Investıtsııalar jáne damý mınıstrligine, Ulttyq qaýipsizdik komıtetimen, Іshki ister mınıstrligimen, «Samuryq-Qazyna» qorymen birlese áýejaılardy, avtobýs jáne temirjol vokzaldaryn qazirgi zamanǵy tekserý júıesimen jabdyqtaý boıynsha biryńǵaı tehnıkalyq talaptardy bekitý turǵysynda sharalar qabyldaýy qajet», - dedi K. Másimov.

Premer-Mınıstr Qazaqstan óńirlerine jumys saparlaryn bastaıtynyn aıta kele, bul sapar barysynda ol osy baǵytta atqarylǵan jumystardyń nátıjesin jeke ózi tekseretinin jetkizdi.

«Barlyq óńirlerge barǵanda ákimder maǵan áýejaılardyń jaǵdaıyn, sondaı-aq tekserý júıesin kórsetýi tıis. Osy oraıda sol jerde tıisti sheshim jasaý qajet bolsa, qajetti qadamdardy jasaımyz», - dedi Úkimet basshysy.