K.Másimov: Áleýmettik jelilerde lańkesterdiń áreketimen kúreste birlesken jáne júıeli sharalar iske asyrylýy tıis
ASTANA. QazAqparat - Áleýmettik jelilerde lańkesterdiń áreketimen kúreste birlesken jáne júıeli sharalar iske asyrylýy tıis. Bul týraly búgin Astanadaǵy Ortalyq jáne Ońtústik Azııa elderindegi zorlyq-zombylyq ekstremızmge qarsy is-qımyl jónindegi óńirlik konferentsııada QR Premer-Mınıstri Kárim Másimov málim etti.
Ekstremızmge jáne lańkestikke adamdardy tartýdyń negizgi ádisteriniń biri ınternet arqyly júzege asyrylatyndyǵyna toqtalǵan Premer-Mınıstr: «Olar álemdik jelini búldirgi ıdeologııany, óshpendilik pen zorlyq-zombylyqty, sodyrlardy tartý men daıarlaýdy, aqparat almasý, qylmystyq is-qımyldardy josparlaý jáne úılestirý úshin paıdalanady. Máselen, tanymal Facebook-ten What's app-qa deıingi áleýmettik jelilerde lańkesterdiń qarýly djıhadqa shaqyratyn málimdemesin bir táýlikte 2 mıllıonnan astam adam qarap shyqqan. Qazaqstan osy materıaldardy anyqtap, tosqaýyl qoıýda. Alaıda bul baǵytta bizdiń kúsh-jiger birlesken jáne júıeli túrde iske asyrylýy tıis. Sonymen birge ekstremızm men lańkestikti nasıhattaýdyń jolyn kesýde azamattyq qoǵam úlken ról atqarýy kerek»,- dedi.
Úkimet basshysynyń paıymynsha, ekstremızm qateri memleketterdiń yntymaqtastyǵy men úılestirý kúsh-jigerin uzaqmerzimdi negizde tereńdetýdi talap etedi.
Aıta keteıik, konferentsııa jumysyna álemniń 24 elinen kelgen delegatsııalar, ıaǵnı EO men Reseıdiń jáne AQSh-tyń ókiletti organdarynyń ókilderi, BUU, EQYQ, ShYU, sondaı-aq basqa da halyqaralyq uıymdar men azamattyq qoǵamnyń, lańkestik pen ekstremızmge qarsy kúres salasyndaǵy jetekshi sarapshylar qatysýda.
