Q. Mámı: Joǵarǵy Sottyń 30 sýdıasy - QazUÝ túlegi
Almatydaǵy QazUÝ-dyń qalashyǵy bul kúni kásibı jetistikteri osy joǵary oqý ornynyń maqtanyshy bolyp tabylatyn kóptegen túlekterine óz esigin aıqara ashty.
Kezdesýdi asha kele, QazUÝ túlekteri qaýymdastyǵynyń prezıdenti Q.Mámı (2009 jyldan) sot júıesi Ult Josparynda belgilengen barlyq 11 tarmaqty ýaqtyly jáne sapaly júzege asyrǵandyǵyn atap ótti. 2016 jylǵy 1 qańtardan bastap, sottar jańa úsh satyly júıede jumys júrgizýde. Investıtsııalyq daýlar jóninde sot isin júrgizetin jeke alqa, Joǵarǵy Sot janynan Halyqaralyq keńes quryldy. Sýdıalyqqa úmitkerlerge qoıylatyn talap kúsheıtildi.
Buǵan qosa, qazirgi tańda qoǵamnyń ıntellektýaldyq áleýetin arttyrý jóninde jańasha qoıylyp otyrǵan talaptardy eskere otyryp, sapaly joǵary bilim alýdyń erekshe mańyzdylyǵyna toqtalyp ótti. «Bizdiń elimizge ozyq bilimi, ınnovatsııalyq oılaý qabileti bar jáne olardy qoldana alatyn mamandar qajet», - dedi Q. Mámı.
Joǵarǵy Sot Tóraǵasynyń aıtýynsha, QazUÝ túlekteriniń 155 myńnan astamy respýblıkanyń ıgiligi jolynda túrli salalarynda tabysty eńbek etýde. Respýblıkada búginde eńbek etip júrgen árbir tórtinshi sýdıa, sonyń ishinde Joǵarǵy Sottyń 30 sýdıasy QazUÝ-dyń túlegi bolyp sanalady. Sot korpýsyna kúrdeli ári kópsatyly irikteýden ótý qajettigin eskerer bolsaq, Q. Mámıdiń pikirinshe, bul atap kórsetilgen sandyq kórsetkishter ýnıversıtet qabyrǵasynda berilgen bilim men tárbıe jumystarynyń sapasynyń naqty dáleli sanalady.
Óz sózin qorytyndylaı kele, 35 jyl buryn QazUÝ-dyń zań fakýltetin bitirgen, zań ǵylymdarynyń doktory, professor Q. Mámı bul joǵary oqý orny kóptegen túlekter úshin ózgeshe bir áleýmettik baspaldaq bolǵanyn, olardyń bolashaǵyna ıntellektýaldyq negiz qalap, ómirge joldama bergenin atap ótti.
«Sizderdi alda jańa jetistikter men túrli jaıttarǵa, tabystar men qıyndyqtarǵa toly uzaq ta qyzyqty jol kútip tur. Sizder bul joldan súrinbeı ótesizder dep oılaımyn. Sebebi, sizder ómirlik qajettilikke saı bilimdi QazUÝ qabyrǵasynda aldyńyzdar. Endi tek óz kúsh-qaırattaryńyzǵa senim artyp, kez kelgen bıikti baǵyndyrýǵa tıissizder. Aldaryńyzǵa naqty maqsat qoıyp, tabandylyq tanytyp, iske jigermen kirisińizder», - dep túıindedi sózin Q.Mámı.
Qaýymdastyqtyń atynan ol stýdentterge saýatty jáne óz isin jetik biletin maman ǵana emes, eń aldymen, óz eliniń shynaıy patrıoty bolýdy tiledi, dep habarlaıdy QR Joǵarǵy Sotynyń baspasóz qyzmeti.
