Q. Mámı: Parlamenttiń merziminen buryn taratylýyna eshqandaı negiz joq

Búgin Parlament Senatynyń jalpy otyrysynan soń jýrnalıstermen bolǵan brıfıngte Senat Tóraǵasy Qaırat Mámı osylaı málim etti.

«Meniń pikirimshe, búgingi kúni tutastaı Parlamenttiń de, onyń jeke palatalaryn da taratýǵa eshqandaı negiz joq. Qos palatanyń depýtattary saılaýshylar aldyndaǵy óz mindetterin tolyq kólemde oryndap jatyr. Osy sessııa barysynda 96 zań qabyldanǵany sonyń aıǵaǵy. Bular memlekettiń odan ári damýyn, jurtshylyqtyń ál- aýqatyn qamtamasyz etýde asa mańyzdy qujattar bolyp tabylady. Sondyqtan da, Parlamenttiń taratylatyny týraly áńgime bolmaýy kerek dep esepteımin», - dedi Q. Mámı.

Osy rette Senat Tóraǵasy aldaǵy ákimder saılaýyna da basa nazar aýdarý qajettigin jetkizdi. Onyń aıtýynsha, bul bizdiń elimizdegi asa mańyzdy saıası úderis.

«Bul saıası oqıǵanyń máni men mańyzyna, taǵdyrlylyǵyna basa nazar aýdarǵan lázim. Óıtkeni, mundaǵy basty másele jalpy basqarýshylyqty ortalyqsyzdandyrý jaıynda bolyp otyr. Kóptegen quzyretter men fýnktsııalar ortalyqtan jergilikti jerlerge beriledi», - dedi ol.