Q.Mámı kezekten tys Prezıdenttik saılaýdy ótkizý barysynda zańdylyqty qamtamasyz etý boıynsha oblys prokýrorlarymen on-laın keńes ótkizdi
ASTANA. 16 aqpan. QazAqparat /Gúlmıra Álıakparova/ - Búgin Bas prokýror Qaırat Mámı Qazaqstan Respýblıkasynda ótetin kezekten tys Prezıdenttik saılaý barysynda zańdylyqty qamtamasyz etý máseleleri boıynsha oblys prokýrorlarymen on-laın rejiminde keńes ótkizdi.
Onyń barysynda oblys prokýrorlaryna ókiletti jáne jergilikti atqarýshy organdarmen saılaýdy ózara is-qımylda ótkizý barysynda zańdylyqty, ashyqtyq pen ádilettilikti qamtamasyz etý tapsyrmasy berildi.
Atap aıtqanda, Bas prokýror saılaýshylardyń tizimderiniń tolyqtyǵyn jáne rastyǵyn, saılaý komıssııalaryn qalyptastyrýdyń zańdylyǵyn, kandıdattardyń saılaýshylarmen kezdesý júrgizý jáne úgit-nasıhat materıaldaryn ornalastyrý quqyqtaryn qamtamasyz etýdi júktedi.
Beıne-keńes barysynda sondaı-aq, azamattardyń eńbegine tıisti jaǵdaı jasaý jáne jalaqyny ýaqytyly tóleý, úleskerlik qurylysqa qatysýshylardyń múddelerin qorǵaý boıynsha túbegeıli sharalar qabyldaý qajettigine nazar aýdaryldy.
Q.Mámı, oblys prokýrorlarynan kásipkerlerdi negizsiz tekserýge tosqaýyl qoıýdy talap etti. Al Bas prokýratýranyń jumys tobyna saılaý barysynda barlyq prokýratýra organdarynyń qyzmetin úılestirýdi, saılaý naýqanyna qatysýshylardan konstıtýtsııalyq quqyqtaryn qorǵaý jóninde túsetin ótinishterdi ýaqtyly qaraýdy qamtamasyz etý tapsyryldy.
