Q. Mámı Elbasynyń joǵary senimine rızashylyǵyn bildirdi

Bul týraly Qazaqstan Respýblıkasy Parlamenti Senatynyń baspasóz qyzmetinen habarlady.

«Qaı qyzmette júrsem de, senimińizdi aqtaýǵa ýáde beremin. Joǵarǵy Sottyń Tóraǵalyq qyzmeti - men úshin tanys dúnıe. Sońǵy kezderde sot júıesine alańdaýshylyq bildirip júrgenińizdi bilemin. Sot bıliginiń bedelin kóterýge ózimniń áriptesterimmen birlese otyryp, barlyq jınaǵan tájirıbemdi, kúsh-jigerimdi jumsaımyn dep sendiremin.

Qurmetti Nursultan Ábishuly, sońǵy eki jarym jyl ishinde Ózińizdiń usynýyńyzben Senat Tóraǵasy qyzmetin atqardym. Bul qyzmet meniń burynǵy atqarǵan jumystardan ózgeshe ári aýqymdy. Osy laýazymda men ómirlik, halyqaralyq, saıası qyzmet mektebinen ótip, tájirıbe jınaqtadym dep oılaımyn. Ol úshin áriptesterime, Apparat qyzmetkerlerine birlesip istegen qyzmetteri úshin rızashylyǵymdy bildiremin.

Senat depýtattary - elimizdiń qadirli azamattary, óz Otanynyń patrıottary jáne Ózińizdiń senimdi ókilderińiz. Jańa Senat Tóraǵasyna jáne áriptesterime zań shyǵarýshylyq qyzmetinde jańa tabystar tileımin»,- dedi Q. Mámı.