Q.Lama Shárip Qazaqstandaǵy Rım-katolık shirkeýiniń basshysymen kezdesti
ASTANA. 5 qyrkúıek. QazAqparat - QR Din isteri jónindegi agenttiginiń tóraǵasy Qaırat Lama Shárip Qazaqstandaǵy Rım-katolık shirkeýiniń basshysy Tomash Bernard Petamen kezdesti, dep habarlady agenttiktiń baspasóz qyzmeti.
Kezdesý barysynda konfessııaaralyq kelisimdi nyǵaıtýda, qoǵamnyń rýhanı-adamgershilik qundylyqtaryn damytýda Rım-katolık shirkeýiniń oń róli atap ótildi.
Astana qalasyndaǵy Rım-katolık arhıeparhııasynyń mıtropolıti Tomash Peta Din isteri jónindegi agenttiktiń jaýapty tulǵalaryn jáne QR Prezıdenti janyndaǵy Áıelder jáne otbasylyq-demografııalyq saıasat jónindegi ulttyq komıssııa múshelerin Astanada 16-18 qyrkúıek kúnderi ótetin Senim, otbasy jáne ómir týraly Azııalyq-tynyqmuhıttyq 18-kongreske qatysýǵa shaqyrdy.
Bul kongress Ortalyq Azııada alǵash ret ótkizilmek jáne Rım Papasy Ioann Pavel ІІ-niń Qazaqstanǵa tarıhı saparynyń 10 jyldyǵyna oraılastyrylyp otyr.
Kongreske qatysýshylar «Adam ómirine qarsy jahandyq baǵdarlama», «Bala kótertpeıtin quraldar - ómirge qaýip», «Túsik - osy zamanǵy genotsıd», «Ekstrokorporatıvtik uryqtandyrý jáne basqa da reprodýktıvtik tehnologııalar: etıkalyq jáne moraldyq máseleler», Sýrrogattyq analyq jáne rýhanı bala asyrap alý», «Árbir balaǵa - úı. Ómirdi qorǵaýdyń jahandyq jobasy» jáne basqa da taqyryptardy talqylamaq.
