Q.Lama Sharıf zııaly qaýymdy radıkaldy dinı aǵymdarǵa qarsy belsendi úgit-nasıhat jumystaryn júrgizýge shaqyrdy
ASTANA. 25 sáýir. QazAqparat - Qazaqstannyń Din isteri agenttiginiń tóraǵasy Qaırat Lama Sharıf zııal qaýym ókilderin rýhanı mura men ulttyq mádenıetti radıkaldy dinı aǵymdardan saqtaý maqsatynda úgit-nasıhat jumystaryn belsendi atqarýǵa shaqyrdy.
«Búgingi qalyptasyp otyrǵan jaǵdaı qoǵam sanasynda jalǵan dinı ıdeologııalyq kúshterge qarsy myqty ımmýnıtet pen dúnıetanymdyq kózqaras qalyptastyratyn nusqaýlar jasaqtaýdy talap etedi», - dedi Q.Lama Sharıf búgin Astanada «Qazaqstan - bizdiń ortaq úıimiz» atty halyqaralyq konferentsııada sóılegen sózinde.
«Biz qalyń jurtshylyq, dinı birlestikterdiń ókilderi, etnıkalyq qoǵamdastyqtar, ǵylymı jáne shyǵarmashylyq zııaly qaýym ókilderi rýhanı mura men ulttyq mádenıetti, rýhanı negizimizdi radıkaldy dinı aǵymdardan saqtaý úshin aqparattyq, ǵylymı úgit-nasıhat jumystaryn belsendi atqarýy qajet dep sanaımyz. Qoǵamnyń rýhanı baılyǵyn arttyrýdaǵy eń basty mindet adamgershilikke bastaıtyn, adaldyq pen ádildikke úndeıtin, memleketti jáne salt-dástúrlerdi súıýge tárbıeleıtin ıslam qundylyqtaryn túsindirý bolyp tabylady», - dep atap ótti agenttik basshysy.
Onyń aıtýynsha, din sonaý ǵasyrlardan beri rýhanı qundylyqtar men halyqtyń dástúrin saqtaýdyń eń kúshti quraly bolyp keldi.
«Qazaqstan - bizdiń ortaq úıimiz» atty halyqaralyq konferentsııa L.Gýmılev atyndaǵy Eýrazııa ulttyq ýnıversıtetinde ótýde. Oǵan Qazaqstan, Reseı, Bashqurtstan, Tájikstan, Qyrǵyzstan elderiniń túrli din ókilderi men múftıleri qatysýda.
