Q. Lama Sharıf: Ekstremıstik mazmundaǵy materıaldar jarııalaıtyn 34 sheteldik saıt anyqtaldy

 Bul týraly búgin QR Úkimeti janyndaǵy Dinı birlestiktermen baılanystar jónindegi keńestiń otyrysynda elimizdiń Din isteri agenttiginiń tóraǵasy Qaırat Lama Sharıf aıtty.

«Agenttiktiń ortalyq apparaty men aýmaqtyq departamentterinde sarapshylar tobyn qurdyq. Olardyń qyzmeti jóninde tıptik ereje men sarapshylar qorytyndylarynyń úlgileri bekitildi, ádistemelik negiz daıyndaldy», - dedi agenttik basshysy.

Q.Lama Sharıftiń atap ótýinshe, agenttik qurylǵan merzim ishinde dinı mazmundaǵy shamamen 1000 materıalǵa  dintaný saraptamasy júrgizildi. Taǵy 1,5 myń basylym aldyn ala dintaný saraptamasynan ótti jáne olarǵa qatysty tıisti sheshim qabyldanýda. Olardyń nátıjesi boıynsha dintaný saraptamasynyń oń qorytyndysyn alǵan 300-ge jýyq dinı ádebıettiń tizimi Din isteri agenttiginiń saıtyna ornalastyrylǵan. Al qalǵandary tehnıkalyq jóndeýden keıin ornalastyrylatyn bolady.  Zańǵa qaıshy 93  materıal men taratýǵa usynylmaıtyn basylymdar boıynsha tıisti sheshimder qabyldanýda.

«Dinı-ekstremıstik jáne lańkestik toptardyń aqparattyq alańdaryn joıý, shekteý maqsatynda ınternet-saıttarǵa monıtorıng júrgizý jáne jabý boıynsha jumystar júrgizilýde. 2012 jyldyń І toqsanynda 800 saıt taldandy, olardyń ishinde ekstremıstik mazmundaǵy materıaldardy jarııalaıtyn 34 shet el saıty anyqtalyp, tıisti sheshim qabyldaý úshin Bas prokýratýraǵa joldandy», - dedi agenttik tóraǵasy.