Q.Qojamjarov ózi basqaryp otyrǵan agenttik qyzmetkerleriniń negizgi mindetterin atady
ASTANA. QazAqparat - Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń qyzmetkeri ádil, ári qııanatqa barmaıtyn jáne para almaıtyn bolýy tıis. Bul týraly búgin Astana agenttiktiń keńeıtilgen keńesinde osy vedomstvonyń tóraǵasy Qaırat Qojamjarov málim etti.
«Bizdiń qyzmetti bastaý úshin qajetti quqyqtyq uıymdastyrýdyń negizi quryldy. Agenttiktiń basymdyqty maqsattaryna toqtalatyn bolsam, birinshi kezekte sizderge qoıylatyn talaptarǵa nazar aýdarǵym keledi. Sizder Memleket basshysynyń joǵary senimine laıyqty bolýlaryńyz kerek jáne qoǵamnyń senimin aqtaý úshin barlyq kúsh-jigerlerińizdi salýlaryńyz qajet. Biz etıkalyq talaptardyń joǵary deńgeıin árdaıym ustap turýymyz shart. Memlekettik qyzmetkerlerdiń jemqorlyqqa qarsy modeliniń negizinde ar-namys kodeksin múltiksiz saqtaý jatyr. Bul - bizdiń minsiz jumysymyzdyń mańyzdy talaby»,-dedi Q. Qojamjarov vedomstvo qyzmetkerlerine qaratyp aıtqan sózinde. Osy oraıda ol agenttik qyzmetkerleri ádildikke ekpin qoıyp, óziniń jumysyna adal bolýy, sondaı-aq para almaýy tıis ekenin qadap aıtty. «Sondyqtan da biz ózimizden bastap, jemqorlyqqa qarsy shekteýlerdi oryndap, qyzmet mártebesin qyzmettik emes maqsattarda paıdalanbaý, azamattardyń quqyǵy men zańdy múddesine nuqsan keltirmeý mindetterin basty nazarda ustaımyz. Kez kelgen uıymnyń tabysty jumys isteýi ujymdaǵy ózara túsinistik deńgeıine baılanysty. Sondyqtan da atalǵan basymdyqtardy oryndaý maqsatynda barlyqtaryńyzdyń, ásirese basshylardyń nazaryn aýdarǵym keledi. Osy oraıda alda turǵan maqsattardy sheshý úshin bizdiń jumysymyzda birilese jumys isteý aıryqsha mańyzdy. Prezıdentke esepti jáne baǵynyshty memlekettik organ óziniń qyzmetine kásibı túrde qyzmet etýde barlyq qyrynan alyp qaraǵanda árdaıym úlgi bolýy tıis»,-dedi ol.
