Q.Kósherbaev Syr óńirinen ásker qataryna attanǵan jastarǵa sát-sapar tiledi (FOTO)
QYZYLORDA. QazAqparat - Egemen elimizdiń aıbyndy áskeriniń qataryna Syr óńirinen bıyl kóktemde 700-den asa azamat attanady. Solardyń bir legin búgin oblys ákimi Qyrymbek Kósherbaev shyǵaryp salyp, olarǵa sát-sapar tiledi, dep habarlady oblys ákimdiginiń baspasóz qyzmetinen.
Qazir áskerge shaqyrylýshylarǵa qoıylar talap kúsheıdi. Olardyń densaýlyqtary quryshtaı berik bolýy shart. Bilimine de barynsha nazar aýdarylýda. Bul - jańa býynnyń sarbazdary joǵary áskerı daıyndyqta bolady degen sóz.
- Sizder búgin ásker qataryna attanǵaly otyrsyzdar. El tynyshtyǵyn kúzetý - azamattyq borysh. Qazir zaman tynysh. Alaıda, bul Otan kúzetindegi jaýyngerdiń jaýapkershiligin jeńildetpeıdi. Alashtyń anasy - Syr eliniń búgingi jastary alǵan tálim-tárbıesi, bilimi men ómirlik tájirıbesiniń arqasynda merzimdi áskerı qyzmetin joǵary jaýyngerlik deńgeıde atqaratynyna senimimiz mol. Osyǵan oraı, men Sizderge úlken senim artyp otyrmyn, - dedi oblys ákimi Q.Kósherbaev.
Áskerı boryshyn óteýge bet burǵandarǵa oblys ákiminiń atynan Qadyr Myrza Áliniń «Almas jerde qalmas» kitaby tabys etildi. Sonymen qatar bolashaq sarbazdardyń ata-analary da aq jol tilep, Otan aldyndaǵy boryshtaryn aman-esen ótep qaıtýlaryna tilektestikterin bildirse, oblystyq Ardagerler keńesiniń tóraǵasy aq batasyn berdi.
